Jambylda 274 memlekettik qyzmetshiniń orny bos tur

TARAZ. QazAqparat - Jambyl oblysyndaǵy memlekettik qyzmetshilerdiń shtat sany 5080 bolsa, búginde onyń naqty sany 4806 qyzmetshi nemese 94,6 paıyzdy qurady. Al, bos laýazymdar úlesi - 274 oryn nemese 5,4 paıyz, dep habarlaıdy QazAqparat.

Bul týraly Óńirlik kommýnıkatsııalar qyzmetinde ótken brıfıngte aıtyldy. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basqarma basshysy Erjan Jumabekov oblystaǵy memlekettik qyzmetshilerdiń ortasha jasy - 39,9, ortasha memlekettik qyzmet ótili - 10,7 jyl ekenin jetkizdi. Sondaı-aq, búginde oblysta Prezıdent janyndaǵy Memlekettik basqarý akademııasynyń - 16, «Bolashaq» baǵdarlamasynyń - 3 túlegi memlekettik qyzmette ter tógip júr.

«Ótken jyly 505 memlekettik qyzmetshige synaq merzimi taǵaıyndalsa, onyń 130-ynyń synaq merzimi aıaqtalmaǵan. Esepti kezeń ishinde jalpy 1342 memlekettik qyzmetshini oqytý josparlanyp, jospar 100 paıyzǵa oryndaldy. Sonyń ishinde qaıta daıarlaý kýrsynan - 516 qyzmetshi, biliktiligin arttyrý kýrsynan 826 qyzmetshi ótti»,-deıdi Erjan Jumabekov.

Aıta keteıik, ótken jyly oblysta testileýden ótýge barlyǵy 6042 azamat ótinish bildirgen. Ótinish bildirgen azamattardyń ishinen 2520 adam nemese 41,7 paıyzy testileýdiń shekti máninen ótken.