Jambylda 27 myńnan astam qala balasy jazǵy demalysyn aýylda ótkizip jatyr

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken keńeste balalardyń jazǵy demalysyn uıymdastyrý máseleleri qaraldy, dep habarlaıdy QazAqparattilshisi.

Kún tártibindegi másele boıynsha oblystyq bilim basqarmasy basshysynyń mindetin atqarýshy Talǵat Jamalov baıandama jasady.

Aǵymdaǵy jyldyń 1 maýsymynan bastap mektep janyndaǵy 414 lagerde 23893 bala demalyp, túrli baǵyttar boıynsha uıymdastyrylǵan is-sharalar jáne sabaqtarmen qamtylǵan.

«Jazǵy demalys kezinde aýyldyq jerlerge ata-ájelerine demalysqa ketken oqýshylardyń da esebi júrgizilip jatyr. Taraz, Qarataý, Jańatas, Shý qalalarynda turatyn 27 myńnan astam bala aýyldarda demalýda», - dedi T.Jamalov.

Kóp balaly jáne az qamtylǵan otbasylardan shyqqan balalardyń jazǵy demalysyna jergilikti bıýdjetten 555 mıllıon teńgeden astam qarajat bólingen.

Qala syrtyndaǵy jeti balalar lagerinde qajetti medıtsınalyq tekserýden ótken 4172 bala saýyqtyrý jáne oıyn-saýyq sharalarymen qamtylǵan.

Spıkerdiń aıtýynsha, mektepterde týrnıketter ornatylyp, dabyl túımeleri, beınebaqylaý kameralary Jambyl oblystyq polıtsııa departamentiniń jedel basqarý ortalyǵymen biriktiriledi.

Buǵan deıin áleýmettik jelilerde ata-analardan «Berikqara», «Bolashaq» lagerleriniń jumysyna qatysty shaǵym túsken bolatyn.

T. Jamalov qazir ondaǵy jaǵdaı tolyǵymen baqylaýǵa alynǵanyna sendirdi.

«Oqýshylardyń qaýipsizdigi men amandyǵy bárinen mańyzdy. Olar úshin qaýipsiz orta qalyptastyrý qajet. Kıiz úı lagerlerin, tarıhı oryndarǵa ekskýrsııalar uıymdastyrý kerek. Jańa oqý jylynyń bastalýyna az ýaqyt qaldy. Muǵalimder mektepterdiń daıyn ekenin aıtýda. Biraq aldyn ala tekserý júrgizip, barlyq problemalyq máselelerdi zerdeleý boıynsha jumys júrgizińizder», - dep oblys ákimi jaýapty tulǵalarǵa naqty tapsyrmalar júktedi.