Jambylda 252 myń gektardan astam jaıylym paıdalanylmaǵandyǵy anyqtaldy
QR Prezıdenti Qasym-Jomart Toqaevtyń tapsyrmasyna sáıkes Jambyl oblysynda paıdalanýsyz jatqan aýyl sharýashylyǵy jerlerin memleket qoryna qaıtarý boıynsha jumysshy toptary quryldy.
Jambyl oblysynyń ákimi Berdibek Saparbaevtyń tóraǵalyǵymen ótken keńeste arnaıy top jumysynyń aralyq qorytyndylary saralandy.
Jer qatynastary basqarmasynyń basshysy Baqtııar Kópbosynov aýyl sharýashylyǵy maqsatyndaǵy jerlerdiń paıdalaný tıimdiligine jan-jaqty taldaý júrgizilgenin, árbir aýyldyq okrýg boıynsha aýyl sharýashylyǵy jerleriniń kartasy ázirlengenin, jer zańnamasynyń normalary boıynsha ádistemelik usynymdar daıyndalǵanyn jetkizdi.
«Oblys boıynsha jaıylymdyq jerlerdiń jalpy aýdany 8,1 mıllıon gektar. Bul óńirde tirkelgen 860,2 myń bas shartty mal basyna shaqqanda 9 gektardan keledi. Eger qolda bar jaıylym qoryn tıimdi paıdalana bilsek, onda jaıylym tapshylyǵyn sheshýge tolyq negiz bar», - dedi B.Kópbosynov.
Onyń aıtýynsha, jaıylym tapshylyǵynan kóptegen aýyldaǵy jeke qosalqy sharýashylyqtarynda maldy ustaýǵa qatysty veterınarııa talaptary saqtalmaı otyr.
«Osy máseleni sheshý úshin aýdan ákimderine bes negizgi baǵyt boıynsha shara qabyldaý tapsyryldy», - dedi B.Kópbosynov.
Sondaı-aq, jer paıdalanýshylarmen memorandýmǵa qol qoıylyp, olar ıeligindegi jerlerge mal jaıýǵa kedergi keltirmeýge mindetteldy. Búginge deıin, 486,5 myń gektardan astam aýyl sharýashylyq alqaptaryn paıdalanýǵa kelisim jasalyp úlgerdi, jumys jalǵasady. Qazirgi tańda 100 aýyldyń jer paıdalanýshylarymen osyndaı memorandýmǵa qol qoıylǵan.
«Mundaı memorandým alǵash bolyp bizdiń oblysta qolǵa alynyp otyr. Bul ózge de óńirlerge úlgi retinde taralatynyna senimdimin», - dedi basqarma basshysy.
Budan soń, jerlerdi paıdalaný jáne qorǵalýyn baqylaý basqarmasynyń basshysy Tamabek Ábilhaıyr baıandama jasady. Ol zerdeleý jumystarynyń qorytyndysymen oblys aýmaǵynda 252 277 gektar jaıylym jer paıdalynýsyz jatqany anyqtalǵanyn habarlady. Ásirese, bul oraıda Moıynqum, Sarysý, Qordaı aýdandaryndaǵy kórsetkish kóńil kónshitpeıdi.
Zerdeleý barysynda túsindirý jumystarynyń nátıjesinde 269 891 gektar jaıylymǵa mal basy tirkelgen. Aýmaǵy 6 124 gektar bolatyn 120 jer ýchaskesi ıesiz múlik retinde esepke alynyp, 11 630 gektar jaıylymdy paıdalanýshylar óz erkimen memleket menshigine qaıtardy.
A. Tamabek oblys ákiminiń tapsyrmasyna oraı jyl sońyna deıin paıdalanýsyz jatqan 82 myń gektar aýyl sharýashylyǵy maqsatyndaǵy jerdi memleket menshigine qaıtarý boıynsha jospar bekitilip, jumys júrgizilip jatqandyǵyn tilge tıek etti. Jartyjyldyq qorytyndysy boıynsha jospar 68 paıyzǵa oryndalǵan.
Aımaq basshysynyń tapsyrmasy boıynsha aýyldyq okrýg ákimderi aýylsharýashylyq jerlerin utymdy paıdalaný boıynsha atqarylyp jatqan jumystary týraly turaqty túrde esep berip otyrady. Sondaı-aq, aýdan ákimderi jaýapty basqarmalarmen birge aýyl sharýashylyǵy jerleriniń kartasyn tolyqtyrý boıynsha jumys júrgizedi.
