Jambylda 2000-ǵa jýyq otbasy baspanaly bolady
TARAZ. QazAqparat - Jambyl oblysynda bıyl 465 myń sharshy metr turǵyn úı salynady. Nátıjesinde 2000-ǵa jýyq otbasy baspanaly bolmaq,-dep habarlaıdy QazAqparat tilshisi.
Bul jobalar «Nurly jer» baǵdarlamasy aıasynda júzege asyrylýda. Olardyń basym kópshiligi «7-20-25» baǵdarlamasymen beriledi. Búginge deıin oblys boıynsha «7-20-25» baǵdarlamasymen 100-den astam otbasy baspanaly bolǵan. Memlekettik joba bastalǵaly ekinshi deńgeıli bankterge 251 adam ótinish berse, onyń 131-i maquldanǵan.
«Baǵdarlama arqyly jalpy quny 812 mıllıon teńge nesıe rásimdelgen. Bul kórsetkishti eseleý maqsatynda óńirde aýdan, aýyl turǵyndaryn kóbirek qamtý kózdelip otyr. Qazir jergilikti jerlerde túsindirý jumystary bastaldy. Qazir Tarazda biryńǵaı aqparattyq ortalyq jumys istep tur. Munda halyqqa turǵyn úı qurylysy, «7-20-25» baǵdarlamasynyń múmkindikteri, jalpy joba týraly kez kelgen aqparat tegin beriledi. Keńse ashylǵaly 915 adamǵa keńes berilip, 70-ten astamynyń qujattary rásimdelgen», - deıdi Taraz qalalyq turǵyn úı ınspektsııasy bóliminiń basshysy Ǵazız Eralıev.
Aıta ketý kerek, jalpy bıyl memlekettik baǵdarlamamen óńirde 2305 páterli 30 turǵyn úıdiń qurylysy júrgiziledi. Onyń ekeýi - 2020 jylǵa ótpeli joba. Al 21-i nesıege berilse, qalǵany satyp alý quqyǵynsyz úlestiriletin arendalyq baspanalar bolady.
«Aımaqta bul baǵytta turǵyn úımen qamtamasyz etýdiń 3 jyldyq jospary bekitildi. Negizgi qurylys jumystary oblys ortalyǵyndaǵy 15-yqsham aýdanda qyzý júrip jatyr. Bas josparǵa sáıkes kóne shahardyń bul bóligi jańa ortalyqqa aınalady. Qazir munda 80 páterli 10 turǵyn úıdiń qurylysy bastalyp ketti. Aımaqta turǵyn úımen qamtamasyz etýdiń 3 jyldyq jospary bekitildi. Endi jyl saıyn keminde 20 turǵyn úı salynyp, jylda 1600 páter tapsyrylmaq», - deıdi oblystyq qurylys basqarmasynyń bas mamany Erkin Shaızadaev.
