Jambylda 2 myńnan asa balabaqsha qyzmetkeri ózderine tıesili tólemaqyny almaǵan

TARAZ. QazAqparat - Jambyl oblysynyń prokýrorlary 230 kásipkerdiń jáne olardyń 2 myńnan qyzmetkeriniń quqyǵyn qorǵady, dep habarlaıdy QazAqparat.

Naýryz aıynda Taraz qalasynyń prokýrory «Senim marshrýty» jobasy aıasynda kásipkerlermen kezdesti.

Aıta keteıik, «Senim marshrýty» jobasyna prokýratýra halyqpen keri baılanys ornatý, quqyqtyq saýattylyqty arttyrý, azamattar tarapynan shaǵymdardyń aldyn alý jáne júıeli quqyq buzýshylyqtardyń jolyn kesý maqsatynda bastamashylyq jasaǵan.

Kezdesý barysynda kásipkerler 26 myń bala tárbıelenetin balabaqshalardy memlekettik tapsyrys aıasynda qarjylandyrý tómen ekenin aıtyp, qyzmetkerlerge eńbekaqy tóleýde, nysandardy jaldaýda qıyndyqtarǵa tap bolǵanyn jetkizdi.

Taldaý barysynda kásipkerlerdiń ýájderi óz dálelin tapty.

Bıyl aılyq eseptik kórsetkishterdiń jáne basqa da eleýli koeffıtsıentterdiń óskenine qaramastan, 2022 jylmen salystyrǵanda ár balaǵa bólinetin qarjylandyrý kólemi ózgermegeni anyqtaldy.

Tıisinshe, jekemenshik mektepke deıingi uıymdardaǵy eńbekaqy tóleý qory ulǵaıtylmaǵan, saldarynan 2 123 qyzmetkerdiń quqyǵy buzylǵan.

Prokýrorlyq qadaǵalaý aktisi negizinde memlekettik tapsyrys boıynsha jekemenshik mektepke deıingi uıymdardy qarjylandyrý kólemi 1,5 mlrd teńgege ulǵaıdy.

Qalalyq balabaqshalardaǵy árbir balaǵa qarjylandyrý kólemi 4,4 myń teńgege ósip, 46 myń teńgeni qurady, al aýyldyq balabaqshalarda - 5 myń teńgege kóterilip, tıisinshe 50 myń teńge boldy.

Búgingi tańda kásipkerlerge 500 mln teńgege jýyq qarajat tólendi. Qalǵan somany jyl ishinde tóleý josparlanǵan.

Kásipkerlerdiń quqyqtary men zańdy múddelerin qorǵaý jalǵasyp jatyr.