Jambylda 1800-ge jýyq kópbalaly otbasy páter kezeginde tur
TARAZ. QazAqparat – Búginde oblys boıynsha turǵyn úı kezegine 1800-ge jýyq kópbalaly otbasy tirkelse, ol elimizdegi kezekte turǵan 28 100-den astam kópbalaly otbasynyń 6,2 paıyzyn quraıdy , dep habarlaıdy QazAqparat tilshisi Jambyl oblysy ákiminiń baspasóz qyzmetine silteme jasap.
Bul páter kezegin jyljytý úshin óńirde júıeli jumystar qolǵa alynǵan. Atap aıtar bolsaq, bıyl Taraz qalasyndaǵy kópbalaly otbasylarǵa 142 páter satyp alýǵa respýblıkalyq bıýdjetten 1 mıllıard 191,0 mıllıon teńge qarjy qarastyrylyp, qazirgi tańda memlekettik satyp alý jumystary júrgizilip jatyr.
Taraz qalalyq ákimdiginiń málimetinshe, ol páterler 3 bólmeden joǵary, kólemi 60-90 sharshy metrden kem bolmaıtyn kórinedi. Sondaı-aq, ár páterdiń quny 8 mıllıon 400 myń teńgeden aspaıdy dep eseptelgen.
Sondaı-aq, oblystaǵy kópbalaly jáne az qamtylǵan otbasylar úshin 612 páterli 12 jataqhana salynyp jatyr. Atalǵan jataqhanalarda kópbalaly jáne az qamtylǵan otbasylar turǵyn úı kezegi kelgenshe satyp alý quqyǵynsyz ýaqytsha panalaı alady.
«Oblys ákiminiń bastamasymen turǵyn úı kezeginde turǵan kópbalaly otbasylarynyń kezegi kelgenshe baspanamen qamtý maqsatynda 612 páterli 12 jataqhananyń qurylysy júrgizilýde. Jyl sońyna deıin 478 páterli 9 jataqhanany paıdalanýǵa berý josparlanǵan. Qalǵan 3 jataqhana 2020 jyly tapsyrylatyn bolady», - dedi Erkebulan Daýylbaev.
Aıta keteıik, qazirgi tańda paıdalanýǵa berilgen turǵyn úı kóleminiń jalpy aýmaǵy 217,7 myń sharshy metrdi nemese naqty kólem ındeksi 109,8 paıyzdy quraǵan. Esepti kezeńde qala boıynsha 18 568 adam turǵyn úı kezeginde tur eken. Onyń ishinde 1784-i kópbalaly otbasy, 29 jasqa tolmaǵan jetim jáne ata-anasynyń qamqorynsyz qalǵan balalar – 1953, áleýmettik jaǵynan qorǵalatyndar – 8955 jáne memlekettik, bıýdjettik jáne áskerı qyzmetkerler 5876 adam.
