Jambylda 16 meshit Qazaqstan musylmandary dinı basqarmasynyń menshigine ótti

TARAZ. QazAqparat - Jambyl oblysynda jeke menshiktegi 16 meshit ǵımaraty men jer telimi Qazaqstan musylmandary dinı basqarmasynyń menshigine ótti. Sondaı-aq, osy baǵytta 19 meshittiń qujattary rásimdelip jatyr. Al, 4 meshitti QMDB menshigine ótkizýge kedergiler bar, dep habarlaıdy QazAqparat.

Oblystyq din isteri basqarmasynyń basshysy Jangeldi Omarov búginde shetelde dinı bilim alyp jatqan 26 jambyldyq azamattyń 10-y - senimdi, 16-sy - kúmándi oqý oryndarynda oqyp júrgenin aıtady.

«Basqarma sheteldik dinı oqý oryndarynda bilim alyp júrgen oblys jastaryn otandyq bilim ordalaryna qaıtarý jumysyn belsendi júrgizip jatyr. 2018 jyldyń basynda 40 adam shetelde dinı bilim alyp jatqan edi, júrgizilgen jumystyń nátıjesinde 14 azamat elge oraldy», - deıdi Jangeldi Omarov.

Basqarmanyń málimetine súıensek, ótken jyly «Nur Múbárak» ýnıversıtetiniń oqytýshylary óńirdegi 100 ımamǵa 2 aptalyq oqytý kýrsyn uıymdastyrǵan. Buǵan deıin ımamy bolmaǵan oblystaǵy 16 meshittiń de máselesi sheshilip, olar dinı qyzmetshilermen qamtyldy. Mekteptegi «Zaıyrlylyq jáne dintaný negizderi» páninen sabaq beretin barlyq muǵalim arnaıy kýrstan ótken. Sonymen qatar, pándi meńgerý deńgeıin anyqtaý úshin 450 muǵalim, 16127 oqýshynyń qatysýymen testileý júrgizilgen.

Eske sala keteıik, oblys ákimi Asqar Myrzahmetov jaýapty tulǵalarǵa jeke menshiktegi meshitterdi QMDB-nyń menshigine ótkizýde ýaqyt sozbaı, tııanaqty jumys júrgizýdi tapsyrǵan bolatyn.