Jambylda 150-ge jýyq ata-ana jaýapqa tartyldy
Demalys kúnderi polıtsııa qyzmetkerleri kámeletke tolmaǵan jasóspirimder jıi baratyn oryndarǵa reıd ótkizdi.
Tek úsh kún ishinde 68 reıd júrgizilip, onyń barysynda 79 kámeletke tolmaǵan jasóspirim ishki ister organdaryna jetkizildi, 146 ata-ana men ózge de eresek adamdar ákimshilik jaýapqa tartyldy.
«Balalardy tárbıeleý jónindegi ata-ana mindetin tıisinshe oryndamaǵany úshin bir zańdy ókil ákimshilik jaýapqa tartyldy. Túngi ýaqytta oıyn-saýyq mekemelerinde júrgen eki kámeletke tolmaǵan jasóspirim anyqtalyp olardyń ata-anasy men oıyn-saýyq mekemeleriniń ıesine ákimshilik hattama toltyryldy. Sondaı-aq, 21 jasqa tolmaǵan adamdarǵa alkogol satýdyń bes deregi anyqtaldy, dúken ıeleri de ákimshilik jaýapqa tartyldy»,-delingen oblystyq polıtsııa departamentiniń habarlamasynda.
Budan bólek, kámeletke tolmaǵandardyń túnde turǵyn úıden tys jerde bolǵany úshin taǵy 77 zańdy ókili jazalandy. Sonymen qatar, profılaktıkalyq esepke 3 jasóspirim, 14 bala turatyn 9 qolaısyz otbasy alynyp, bir zańdy ókil ata-ana quqyǵynan aıyryldy.
