Jambylda 14 kolledjdiń basshysy tártiptik jazaǵa tartylýy múmkin
TARAZ. QazAqparat - Jambyl oblysynda arnaıy qurylǵan jumysshy top oblystaǵy 23 tehnıkalyq jáne kásiptik bilim berý uıymdaryna tekseris júrgizdi, dep habarlaıdy QazAqparat.
Arnaıy zerdeleý qorytyndysy boıynsha, 3 kolledjde bilim sapasynyń tómendigi, 6 kolledjde sabaq kesteleri durys toltyrylmaǵany, 14 kolledjde túlekterdiń jumysqa ornalasý deńgeıiniń tómendigi anyqtalǵan. Sondaı-aq, 4 kolledjde dýaldyq oqytý boıynsha jumys berýshimen kelisimshart jasalmaǵan bolsa, taǵy 4 kolledjde pedagog qyzmetkerlerdiń sapalyq quramy tómen, biliktilik arttyrý kýrstarynan ýaqytyly ótpegen.
Al, 19 kolledjde medıtsınalyq kabınetter talapqa saı tolyq jabdyqtalmaǵan, 4 kolledjde sabaqqa qatysý deńgeıi tómen, 1 kolledj basshysynyń ústinen aryz-shaǵym túsý faktileri oryn alǵan. Bul týraly blys ákimdiginde ótken jıynda oblys ákimi apparaty áleýmettik-saıası monıtorıng bóliminiń basshysy Oljas Baqqaraev baıandady.
Jıynda oblystyq bilim basqarmasynyń basshysy Rahııa Turmahanbetova kemshilikterge jol bergen bilim mekemeleriniń atyn atap, olarǵa usynylyp otyrǵan tártiptik sharalardy tilge tıek etti. Ol 14 kolledj basshysy men 119 qyzmetkerdi ártúrli tártiptik sharalarǵa tartýdy usyndy.
Oblys ákimi Asqar Myrzahmetov osyǵan deıin bul máseleni qadaǵalamaǵan oblystyq bilim basqarmasy men qalalyq jáne aýdandyq bilim bólimderiniń basshylaryn, tıisti aýdan ákimi orynbasarlarynyń jumysyn synǵa aldy.
Aıta keteıik, kolledjderde stýdentterdiń sabaqqa kelmeýi, bitirýshilerdiń basym bóliginiń jumyssyz júrýi sekildi keleńsizdikter kóp. Osyny eskergen óńir basshysy sapasyz bilim, nátıjesiz jumysqa qomaqty qarjy jumsaǵansha, ol qarajatty halyqtyń aýyz sý, kógildir otyn sekildi áleýmettik máselelerin sheshý jolynda paıdalanýdyń tıimdiligin qadap aıtty.
«Endigi maqsat - jaǵdaıdy tez arada retteý úshin naqty sharalardy qolǵa alý. Ol úshin aldymen, bir aýdandaǵy bir baǵyttaǵy 2-3 kolledjdi biriktirip, 2019 jyldan bastap atalmysh bilim mekemeleriniń jumysyn turaqty túrde baqylaý men baǵalaý júıesin qalyptastyrý kerek. Dırektorlardyń biliktiligi boıynsha óz laýazymyna sáıkestiligi de jiti qaralatyn bolady», - dedi oblys ákimi.
Ǵıbrat Sembaı
