Jambylda 130 myńǵa jýyq kóshet otyrǵyzylady
TARAZ. QazAqparat – Oblys ákimdiginde ótken apparattyóq keńeste óńirdegi aýmaqty abattandyrý jáne tazalaý jónindegi jumystardyń josparly sharalary saralandy, - dep habarlaıdy QazAqparat Jambyl oblysy ákimdiginiń resmı saıtyna silteme jasap.
Atalǵan jıyn barysynda oblystyq energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov mamyr aıyna deıin sozylatyn aýmaqty abattandyrý jáne tazalaý jónindegi eki aılyqtyń bastalǵandyǵyn habarlap, josparly sharalar týraly baıandady. Jalpy bul baǵyttaǵy jumystarǵa 4,1 mlrd. teńge qarajat qarastyrylǵan desek, oǵan 129,5 myń kóshet otyrǵyzý, 1,4 shaqyrym aryqtar men arnalardy tazartý sharalary atqarylmaq. Óńir basshysy bólingen qarajatty barynsha tıimdi paıdalaný kerektigin tilge tıek etti.
N.Aldamjarovtyń aıtýynsha, aımaq basshysynyń buǵan deıin júktegen oblystyq basqarmalarǵa Tarazdyń demalys oryndary men saıabaqtaryn bekitip berý týraly tapsyrmasy oryndalǵan. Osy oraıdaǵy jumystar aýdan ortalyqtarynda da qolǵa alyný kerek.
«Kógaldandyrýǵa erekshe kóńil bólgen durys. Aǵash kóshetterin otyrǵyzý jumystarynyń sapaly oryndalýyn qadaǵalaý kerek. Bir ǵana qaraǵaı kóshetimen shektelýge bolmaıdy. Orman sharýashylyǵy tálimbaqtarymen tyǵyz baılanysta jumys isteńizder. Aǵash otyrǵyzýda ár aýdannyń tabıǵı-klımattyq jaǵdaıyn eskerińizder. Aldymyzda – Naýryz merekesi. Biz merekeni taza jáne jaqsy jaǵdaıda qarsy alýymyz kerek», - dep atap ótti aımaq basshysy.
Sondaı-aq, basqosýda ekonomıka jáne bıýdjettik josparlaý basqarmasynyń basshysy Gúldana Jaýynbekova «Aýyl – el besigi» baǵdarlamasynyń júzege asyrylý barysy týraly baıandady. Baǵdarlama aıasynda ótken jyly úsh aýdan ortalyǵynda úsh mıllıard teńgeden astam qarjyǵa 103 joba júzege asyryldy. Alaıda, merdigerdiń kinásinen Shý aýdanyndaǵy Muhtar Áýezov atyndaǵy mekteptiń kúrdeli jóndeý jumystary áli kúnge aıaqtalmaǵan. Qazirgi ýaqytta ol boıynsha sot protsesi júrýde. Al, aǵymdaǵy jyly baǵdarlama sheńberinde 5,9 mlrd. teńgege 92 joba iske asyrylýda. Sonymen qatar, Ulttyq ekonomıka mınıstrligi jalpy quny 4,8 mlrd. teńge bolatyn taǵy da 148 jobany maquldaǵan.
