Jambylda 13 bas jylqyny qoldy etken ury ustaldy
TARAZ. QazAqparat – Jambyldyq polıtseıler 13 bas jylqyny qoldy etken kúdiktini qolǵa túsirdi, dep habarlaıdy QazAqparat.
Aıta keteıik, ótken jyldyń sońynda atalǵan aýdanǵa qarasty Qulan aýlynyń «Shóńger» taý bókteriniń jaıylymynan 58 jastaǵy turǵynnyń jeke sharýa qojalyǵyna tıesili 13 bas jylqy maly urlanǵany týraly aýdandyq polıtsııa bólimine shaǵym túsken bolatyn. Polıtsııa qyzmetkerleri júrgizgen jedel-izdestirý jumystarynyń nátıjesinde 2020 jyldyń 21 qańtarynda qylmysqa qatysy bar T.Rysqulov aýdanynyń 44 jastaǵy turǵyny anyqtalyp, ustaldy. Bul týraly oblystyq polıtsııa departamentiniń baspasóz qyzmeti habarlady.
«Kúdikti kinásin tolyq moıyndap, aýdandyq ýaqytsha ustaý ızolıatoryna qamaýǵa alyndy. Urlanǵan jylqylar ıesine qaıtaryldy. Qazirgi ýaqytta atalǵan derek boıynsha Qylmystyq Kodekstiń 188-baby 3-bóligimen (urlyq) sotqa deıingi tergeý amaldary júrgizilýde»,- delingen vedomstvo habarlamasynda.
