Jambylda 12 myńǵa jýyq otbasyndaǵy balalar kompıýtermen qamtyldy
TARAZ. QazAqparat – Jambyl oblysynda onlaın-oqytýǵa daıyndyqty pysyqtaý aıasynda az qamtylǵan jáne kópbalaly otbasylardyń balalaryna 11,7 myń kompıýter berildi, - dep habarlaıdy QazAqparat Jambyl oblysy ákiminiń baspasóz qyzmetine silteme jasap.
Koronavırýstyq ınfektsııanyń taralýyna baılanysty shekteýlerge qatysty 6 sáýirden bastap elimizdegi oqýshylar qashyqtan oqytý rejımine kóshedi. Jańa formatta oqytý túri oqýshylardyń úı jaǵdaıynda kompıýter, noýtbýk, gadjettermen qamtylýyn jáne ınternetke qol jetimdiligin talap etedi.
«Búgingi tańda aımaqtaǵy 442 mektepte 230 myńǵa jýyq bala bilim alýda. Onyń ishinde 84 paıyzy oqýshylardyń qashyqtan oqytý túrine ótýge múmkindigi qarastyrylǵan. Olardyń qoldarynda kompıýter, monoblok, noýtbýk, planshet, smartfondary bar. Internetke qosylǵan. Bul oraıda qalǵan 16 paıyz úshin qashyqtan oqytý múmkindigin qamtamasyz etý jaıy mańyzdy bolyp otyr»,-delingen baspasóz qyzmetiniń habarlamasynda.
Óńirdegi 37200 oqýshyda kompıýter, planshet, smartfon joq. Olardyń basym bóligi az qamtylǵan nemese kópbalaly otbasylarǵa jatady. Bul máseleni sheshý úshin mektep balansyndaǵy kompıýterler atalǵan sanattarǵa jatatyn otbasylardaǵy 11 712 oqýshyǵa ýaqytsha bólingen. Budan bólek, jergilikti bıýdjet esebinen taǵy 2 myń kompıýter satyp alynǵan.
Sondaı-aq, oblystaǵy 17,8 myńnan astam bala «Balapan», «El arna» jáne «Qazaq radiosy» radıosy arqyly translıatsııalanatyn sabaqtarǵa qatysýy josparlanǵan.
