Jambylda 12 aýyldy gazben qamtamasyz etetin jańa stansa paıdalanýǵa berildi
Nysannyń qurylysy qysqa merzimde, ıaǵnı tamyz aıynda bastalyp, jeltoqsanǵa deıin aıaqtaldy. Qurylystyń jalpy quny 1 mlrd teńgeden asady. Paıdalanýǵa berilgen Otar stansasynyń arqasynda 42 myń adam turatyn Qordaıdaǵy taǵy 12 aýyl gazǵa qosylatdy.
Quny 4 mlrd teńgeden asatyn atalǵan eldi mekenderge tartylǵan gaz qubyrynyń uzyndyǵy 175 shaqyrym. Kógildir otynǵa birinshi bolyp Kenen jáne Otar aýyldarynyń turǵyndary qol jetkizdi. Tıisti jeliler «Otar aımaǵy» dep atalatyn 12 aýyldyń barlyǵyna jetkiziledi, al turǵyn úılerdi qosý protsesi kezeń-kezeńimen júzege asyrylady.
«Bir jyldyń ishinde bir aýdandaǵy 22 eldi mekendi gazdandyrý ońaı sharýa emes. Ózderińiz kórip otyrsyzdar, Memleket basshysynyń tapsyrmasy boıynsha sizderdiń aýdandarda kóptegen jumys atqarylýda. Aýdandy damytýǵa 35 mld teńge bólindi, 4,6 myńnan astam jumys orny quryldy. Men qurylysshylar men gaz qyzmetkerlerine sapaly ári tıimdi jumys úshin alǵys aıtamyn», - dedi oblys ákimi Berdibek Saparbaev saltanatty sharada sóılegen sózinde.
Otar aýyldyq okrýginiń ardagerler keńesiniń tóraǵasy Salamat Moldajanov Otarda gazdandyrý jumystarynan bólek, sporttyq-saýyqtyrý ortalyǵy ashylyp, mádenıet úıi salynýda, ınfraqurylym damýda ekenin jetkizdi.
Budan soń, stansa qyzmetkerleri saltanatty túrde klapandy ashyp, gaz alaýyn tutatty.
Turǵyn úılerge gazdyń kelgenine eń aldymen úı sharýasyndaǵy áıelder aıryqsha qýanýda. Aımaq basshysy ardager S.Moldajanovtyń úıine arnaıy at basyn burdy.
«Meniń bul úıge kelin bolyp túskenime 40 jyl boldy, biraq eshqashan gaz bolǵan emes. Qysta jylýǵa kem degende 10 tonna kómir jumsalyp, maýsym shyǵyny 150 myń teńgege deıin jetetin. Endi, mine, kúl-qoqys shyǵaryp, tún ortasynda turyp, peshke kómir salyp áýre bolmaımyz», - dedi Jámıǵa apaı. Ony uly aqyn Kenen Ázirbaevtyń nemeresiniń áıeli Gúlaısha Kenen de qoldady.
«Aýylymyzdaǵy turǵyndar tipti gazǵa qosylý úshin kezekke turýda. Adamdardyń ómiri jaıly bola tústi, - deıdi Gúlaısha.
Aıta keteıik, bıyl aýdandaǵy 22 eldi mekendi gazdandyrýǵa 11 mld-qa jýyq teńge baǵyttalǵan. Buǵan deıin kógildir otyn 10 aýylǵa tartylǵan bolatyn, olardyń qatarynda Masanshy, Sortóbe, Aýhatty, Bular batyr, Qarakemer jáne basqa da aýyldar bar.
