Jambylda 110 jastaǵy ájeı turady
TARAZ. QazAqparat – Jambyl oblysy Sarysý aýdanynyń eń qart turǵyndarynyń biri – Amanbala Amanjolova ájeı. Qos ǵasyr kýágeri búginde 110 jasta, dep habarlaıdy QazAqparat tilshisi.
Erte eńbekke aralasqan Amanbala áje áli de tyń. Nebir qıyn kezeńderdi bastan keshken keıýana ótken ómirin erekshe tebirenispen eske aldy.
Aq jaýlyqty ana ómiriniń jartysyn sovhozda saqmanshy bolyp, qoı qyrqyp, mal sharýashylyǵyna arnaǵan. Soqa aıdap, bıdaı oryp, shóp shaýyp, eńbek etýden jalyqpaǵan. Mańdaı ter, adal eńbeginiń arqasynda zeınetke shyǵyp, qurmetke bólengen. Amanbala apa 11 balany dúnıege ákelgen. Baqytty áje kórer jaryǵy bar bes baladan búginde 40-qa jýyq nemere-shóbere súıip otyr.
Qazynaly qart ananyń ómiri qazir kópke úlgi. Ol 1910 jyly qańtar aıynda Saryarqa tósinde ómirge kelipti. 1928 jyly osy Sarysý aýdanyna kóship kelgen. Aýdannyń ol kezde endi ǵana qurylyp jatqan kezi edi.
– Shyraǵym, biz ne kórmedik. Aq pen qyzyldyń soǵysy, el ishin jaılaǵan asharshylyq, qýǵyn-súrgin, soǵys jyldaryndaǵy aýyldaǵy kúızelis, odan keıingi aýyr jyldar, bári-bári myna shaqshadaı bastan ótti. Jer jyrttyq, egin saldyq, túnde maıdandaǵy jaýyngerlerge qolǵap pen shulyq toqydyq. Eki qaınaǵam men shalymnan «qaraqaǵaz» kelgen kúnderi de jylap-syqtap, jumysqa shyǵyp ketetinmin. Qaıǵy men qasiret meniń ǵana basymda emes, halyqqa kelgen náýbat qoı dep, endi qaınym Baltabaıdyń aman oralýyn tiledim. Zaryǵa kútkenmen ol 1947 jyly bir-aq oraldy. Soǵys ýaqytynda eldiń yntymaǵy men birligi qandaı edi shirkin! Úlkender meni ortaǵa alyp, «kúıeýińniń oshaǵyn óshirme, qaınyńa turmysqa shyq» dedi. «Jesirin qańǵytpaǵan, jetimin jylatpaǵan» elden asyp qaıda barasyń, jaraly jaýyngerdiń janyna jalaý bolaıyn dep qaınym Baltabaıdyń eteginen ustadym, – dep eske alady ótken kúndi keıýana.
Kópti kórgen, ǵasyrdan asa jasaǵan ótkenge salaýat, búgingi shúkirshilik aıtýdan talǵan emes.
«Azattyqtyń arqasynda «qoı ústine boztorǵaı jumyrtqalaǵan» myna nurly zamandy kórdim, armanym joq. Endi meniń Jaratqannan jatsam-tursam tileıtinim – eldiń amandyǵy. Ata-babalarymyz armandaýmen ótken asa zor qundylyǵymyz - azattyǵymyz ǵumyrly bolǵaı» dep batasyn berdi ájemiz.
