Jambylda 11 myńnan astam adam jumyssyz retinde tirkeýde tur
TARAZ. QazAqparat - Aǵymdaǵy jyldyń ekinshi jartysyndaǵy málimet boıynsha, Jambyl oblysynda 504,8 myń adam belsendi eńbek etip júr. Jumyspen qamtylǵan halyqtyń ishinde jaldamaly jumyskerler sany 326,1 myńdy qurady. Bul - jalpy eńbekkerlerdiń 65,5 paıyzy, dep habarlaıdy QazAqparat óńirlik statıstıka departamentine silteme jasap.
Jaldamaly jumyskerlerdiń basym bóligi, ıaǵnı 77,3 paıyzy uıymdarda eńbek etedi. Al óz betinshe jumyspen qamtylǵandar sany - 178,7 myń adam. Óz betinshe eńbekpen qamtylǵandardyń aıtarlyqtaı úlesi aýyl sharýashylyǵymen (55,2 paıyzy) jáne saýdamen (29,6 paıyzy) aınalysyp júr.
Úshinshi toqsanda jumyssyzdar sany 25,8 myń adamdy qurady. Jumyssyzdyq deńgeıi 4,9 paıyz bolyp otyr.
2018 jyldyń qazan aıyndaǵy málimet boıynsha, jumyspen qamtý organdarynda 11 633 adam jumyssyz retinde tirkeýde tur.
