Jambylda 100 myńnan astam jumysshynyń jalaqysy ósti

TARAZ. QazAqparat - Jańa jyldan bastap jambyldyq 100 myńnan astam qyzmetkerdiń aılyǵy 1,5 esege ósti. Bul aımaqtaǵy barlyǵy 345 myń jumysshynyń 34 paıyzyn quraıdy, dep habarlaıdy QazAqparat.

Óńirdegi bıýdjettik mekemelerde eńbek etetin 40 myńdaı jumysshynyń jalaqysy ortasha eseppen 35 paıyzǵa kóterildi. Al, eń tómengi aılyq Joldaýda júktelgen mejege sáıkes 42 500 teńgege ósti. Sondaı-aq, ataýly áleýmettik járdemaqylar 2 esege deıin ulǵaımaq.

«23 kásiporyn jumyskerleriniń aılyǵyn kóterip otyr. Nátıjesinde búgingi kúni oblys kóleminde jeke 1 609 kásiporynda 20 900 jumysshyǵa 42 500 teńge jalaqy tóleıtinin rastady. 28 myńnan 42 500-ge kóterildi», -deıdi oblystyq eńbek ınspektsııasy basqarmasynyń basshysy Serǵalı Aıdapkelov.

Aıta keteıik, jańa jyldan bastap elimiz boıynsha 2 mıllıon jumysshynyń aılyq jalaqysy kóterilgen. Ol Qazaqstan aýmaǵynda eńbek etetin azamattardyń úshten birine teń.