Jambylda 10 jasar balaǵa kúrdeli ota jasaldy

TARAZ. QazAqparat - Jambyl oblystyq balalar aýrýhanasynda 10 jasar er balaǵa keýde qýysynyń deformatsııasyn túzetý boıynsha josparly túrde ota jasaldy. Balanyń naqty dıagnozy – «3- dárejeli týa bitken shuńqyr tárizdi keýde deformatsııasy», dep habarlaıdy QazAqparat.

Ortopedııa bóliminde aldyn ala daıyndyqtan keıin endovıdeo assıstentsııasymen Nassa boıynsha torakoplastıka-hırýrgııalyq aralasý júrgizildi. Deformatsııa joıyldy. Jaǵdaıy jaqsarǵan soń 7-shi táýlikte bala úıine shyǵaryldy.

«Jambyl oblystyq kópbeıindi balalar aýrýhanasynda ortopedııa bólimshesinde keýde qýysynyń týa bitken jáne júre paıda bolǵan deformatsııalaryn emdeýdiń ınnovatsııalyq ádisteri 2015 jyldan bastap sátti qoldanylyp kele jatqanyn atap ótken jón. Shuńqyr tárizdi keýde qýysyn túzetý úshin aýrýhanada tómen ınvazıvti torakoplastıka, sonyń ishinde modıfıkatsııalanǵan Donald Nassa otasy jasalady.

Nassa torakoplastıka operatsııasy-bul keýde qýysynyń shuńqyr tárizdi deformatsııasyn joıýǵa arnalǵan mınımaldy ınvazıvti ádisti qoldanatyn hırýrgııa. Mundaı otalar Qazaqstannyń saqtandyrylǵan azamattaryna mindetti áleýmettik medıtsınalyq saqtandyrý (MÁMS) júıesinde qoljetimdi bolyp tabylady», - dep jazdy Densaýlyq saqtaý mınıstrliginen.

Mınımaldy ınvazıvti torakoplastıkanyń artyqshylyqtary:

- keýde qýysynyń aldyńǵy betinde úlken tyrtyqtardy boldyrmaý maqsatyndaǵy keremet kosmetıkalyq nátıje;

- radıkaldy ádistermen salystyrǵanda jumsaq tinderdiń mınımaldy jaraqaty jáne ota kezinde qan joǵaltýdyń mınımaldy mólsheri;

- shuńqyr tárizdi deformatsııasy bar kez kelgen jastaǵy balalarǵa jaramdy;

- otanyń uzaqtyǵy radıkaldy ádistermen salystyrǵanda 1,5-2 esege az.

Vedomstvonyń málimetinshe, ota anestezııamen jasalady, tynys alý jáne júrek qyzmeti baqylanady. Shaǵyn hırýrgııalyq kirýler keýde qýysynyń búıir betteri boıymen ár patsıent úshin jeke-jeke qatań eseptelgen núktelerde oryndalady. Dárigerler keýde qýysynyń mólsheri men pishinin, keýde qýysynyń deformatsııasynyń túri men dárejesin eskere otyryp, plastınanyń jeke konfıgýratsııasyn jasaıdy.

«Ota deformatsııa dárejesine jáne ornatylatyn plastınalar sanyna baılanysty orta eseppen 40-60 mınýtqa sozylady. Naýqas shamamen 7 táýlik aýrýhanada jatady», - delingen habarlamada.

Otadan keıingi kezeńde naýqastarǵa sımptomatıkalyq terapııa jáne tynys alý jattyǵýlary taǵaıyndalady. Osy ýaqyt aralyǵynda naýqastar ál-aýqattarynyń jaqsarǵanyn, tynys alý jetkiliksizdigi belgileriniń tómendegenin baıqaıdy. Denege tolyq salmaq salýǵa otadan soń 6 aıdan keıin ǵana ruqsat etiledi. Degenmen, tolyq jáne turaqty áserge jetý úshin 2-3 jyl ýaqyt kerek. Osydan keıin plastınany alyp tastaý qajet.