Jambylda 1,5 mlrd teńgeni jymqyrǵan alaıaq 8 jylǵa sottaldy
TARAZ. QazAqparat – Jambyl oblysynda 1,5 mıllıard teńge kólemindegi iri qarjyny jymqyrǵan alaıaq ustaldy, dep habarlaıdy QazAqparat.
Taraz qalalyq polıtsııa basqarmasy qurǵan arnaıy jedel-tergeý tobynyń joǵary kásibıligi men minsiz jumysynyń nátıjesinde Jambyl oblysynda alǵash ret jeke kásipkerlikten iri kólemdegi 1,5 mıllıard teńgeni jymqyrý deregi anyqtalyp, dáleldendi. Іri qarjylyq alaıaqtyq áreketi óńirdegi janarmaı quıý beketteriniń birinde oryn alǵan. Bul týraly oblystyq polıtsııa departamentiniń baspasóz qyzmeti habarlady.
Oblystaǵy bilikti tergeýshilerdiń toǵyz aı boıy júrgizilgen jiti tergeý amaldarynyń nátıjesinde prokýratýranyń qadaǵalaýymen qaladaǵy iri janarmaı quıý jelisiniń ıesi qurǵan kúrdeli qarjylyq «basqatyrǵyshtyń» qupııasy áshkerelenip, zańsyz áreketteri anyqtalǵan.
«Kúdikti aldymen tórt avtojanarmaı quıý beketine ıelik etetin seriktestiktiń úsh quryltaıshysynyń biri bola tura eki joldasynyń senimine kirip, barlyq qarjy operatsııalaryn ózi júrgizetin bolyp kelisedi. Bul múmkindikti ol óz paıdasyna tıimdi paıdalana bilgen. Ýaqyt óte kele úlken tabys ákelgen bıznes keńeıe tústi. JShS-de 23 jaǵar-janarmaı stansasy jáne jeti munaı qoımasy boldy. Kúdikti kompanııanyń jeke basqarýshysy bas dırektor mártebesin ıemdenip, iri kólemde nesıe alyp, olardy tólemeı, kompanııanyń atyna qomaqty qaryz jınaıdy. Aqshalaı mindettemeler shyǵarady jáne enshiles seriktestikti jasaıdy. Ol bir kompanııadan ekinshi kompanııaǵa aqsha aýdarý jáne esep qujattaryn basqarý arqyly negizgi JShS-ge zııan keltiredi» delingen vedomstvo habarlamasynda.
Ózin uzaq ýaqyt boıy janarmaı quıý beketteriniń «patshasy» sezingen ol otbasyn da osy bızneske qosyp, barlyq paıdany ózi ıemdenip otyrǵan. Ol óziniń asa iri kólemdegi kirisin muqııat jasyrǵan. Biraq seriktestik bankrotqa ushyraǵannan keıin quryltaıshylar tekserý barysynda kásiporynnyń tapshylyǵy segiz mıllıard teńgeni quraıtynyn anyqtady.
Toǵyz aılyq tergeý barysynda tórt ekonomıkalyq saraptamanyń kómegimen 2006-2015 jyldar aralyǵyndaǵy banktik jáne salyqtyq esepter boıynsha qarjylyq qujattardy jınaý jáne qalpyna keltirý qajet boldy. Bul óz kezeginde asa muqııattylyq pen asqan kásibılikti qajet etti.
«Sot otyrysyna kúdiktiniń úsh advokaty qatysty. Aıyptaý tek oǵan ǵana emes, onyń áıeline de taǵyldy. Óıtkeni kóp qarajat sol arqyly ótip otyrǵan. Kúdiktige sot sheshimimen 4,5 mıllıard teńge aıyp taǵyldy. Mysalǵa alatyn bolsaq, ol kezde bul qarjy bir Baızaq aýdanynyń bıýdjetimen teń edi. Biraq kóp qujattar joǵalǵandyqtan sot 1,5 mıllıard teńge kóleminde sheshim shyǵardy, olar tolyq dáleldendi. Polıtsııa departamentiniń tergeý bólimsheleri mundaı iri kólemdegi qarjylyq urlaý deregin alǵash ret qolǵa aldy, kúrdeli ekonomıkalyq shemalardy anyqtaýǵa kóp kúsh jumsaý kerek boldy. Osyǵan qaramastan, jedel-tergeý toby atqarylǵan tapsyrmany abyroımen oryndady» delingen baspasóz qyzmetiniń habarlamasynda.
Sot kúdiktini segiz jylǵa bas bostandyǵynan aıyrdy. Biraq raqymshylyq sharalary eskerile otyryp bul merzim tórt jylǵa deıin qysqardy.
