«Jambyl-jylý» jumysshylary qora tazalap, qoı qyrqýǵa májbúr bolǵan

TARAZ. QazAqparat - «Jambyl-jylý» kommýnaldyq memlekettik mekemesiniń basshysy jumysshylardy jeke sharýasyna jumsaǵan, dep habarlaıdy QazAqparat tilshisi.

Tarazda jylý qazandyǵynyń jumysshylary óz qyzmetterinen bólek, qoı baǵyp, qora tazalaýǵa, sylaq sylaýǵa májbúr.

Budan ári basshylyqtyń mundaı talabyna kóngisi kelmegen qyzmetkerler shý shyǵardy. Olar senimgerlik basqarýmen jekege ótken mekemeniń memleketke qaıtarylýyn talap etti. Óıtkeni strategııalyq nysan jekemenshikke berilgeli olarǵa basshylyqtyń jeke júktemeleri arta túsken.
Aıtýlarynsha, mekemeniń slesar, operator, ınjener mamandary mal baǵyp, qora tazalap, qurylysshy da bolyp ketken.
«Basshylyq Qostanaıǵa «egin egesińder» dep, issaparǵa jibergen bolatyn. Tórt jigit bolyp bardyq. Biraq, egin emes, aýladaǵy qoqysty jınadyq. Ertesine qoı qyryqtyq», – deıdi «Jambyl-jylý» MKK slesari Ǵalymjan Bıtóreev.
Qazandyq jumysshylarynyń aıtýynsha, olar Qostanaı oblysyndaǵy bastyqtyń qorasynda qara jumysqa jegilgen. Al qujat boıynsha ózge óńirge emes, jaqyn aýdandardyń birine jiberilgen.
«Barmaımyz» dep qarsylyq bildirgenbiz, «onda óz erikterińmen jumystan shyǵasyńdar», - dedi. Jumystan shyǵyp ketpes úshin amalsyzdan bardyq», – deıdi «Jambyl-jylý» MKK bólim basshysy Jańabek Májıtov.
Mekeme dırektory jumysshylarynyń sózderin joqqa shyǵarmady. Ol senimgerlik basqarýǵa alǵan soń qyzmetkerlerdi qalaı, qaıda jumsaıtynyn ózderi sheshetinin aıtty. Jazda tabys bolmaǵandyqtan, aqysyz demalysqa jiberýdiń ornyna mal baqtyryp, aılyq berýdi jón sanapty.
«Jazda jumys toqtaǵan soń, aqsha tabýymyz kerek. Kásiporynda 600 adam jumys istese, jazda 350 adam aqysyz demalysqa shyǵýǵa májbúr. Demek, qosymsha jumys isteýge bolady», – dep málimdedi «Jambyl-jylý» MKK dırektory Múslim Qasymov.
Biraq, kelisimshartta mal baqtyrý jóninde eshteńe jazylmaǵan.
Jumysshylar sondaı-aq, jalaqy máselesin de kóterdi. Basshylyq jalaqyny aldaǵy jylý maýsymynda kóteremiz dep sendirdi. Alaıda, ashýly qyzmetkerler buǵan kónbedi. Olar mekeme memleketke qaıtarylyp, seriktestik jumysyna tekseris taǵaıyndalýyn suraıdy.
Buǵan deıin Jambyl oblysyna 25 mıllıon teńgeniń temekisin zańsyz kirgizbek bolǵanyn jazǵan bolatynbyz.