Jambyl jáne Ońtústik Qazaqstan oblystarynda nan baǵasynyń kóterilýine qandaı da bir aıǵaqty negiz joq - A.Kúrishbaev
ASTANA. Shildeniń 20-sy. QazAqparat /Rýslan Ǵabbasov/ - Jambyl jáne Ońtústik Qazaqstan oblystarynda nan baǵasynyń joǵarylaýyna qandaı da bir aıǵaqty negiz joq.
Bul týraly búgin Úkimet otyrysynda Aýyl sharýashylyǵy mınıstri Aqylbek Kúrishbeev málim etti.
Nan baǵasyna toqtalǵan mınıstr, Jambyl jáne Ońtústik Qazaqstan oblystarynan basqa óńirlerde nan baǵasy aıtarlyqtaı ózgermegenin jetkizdi.
«Atalǵan oblystarda aǵymdaǵy aıda nan baǵasy ósti. Nan baǵasynyń kóterilýine baılanysty jasalǵan taldaýǵa qaraǵanda, baǵanyń joǵarylaýyna qandaı da bir aıǵaqty negiz joq. Bul faktilerdi bólek qurylymdardyń alapsatarlyq is-qımyldary retinde baǵalaý kerek», - dep atap ótti mınıstr.
«Birinshiden, aýa-raıynyń qurǵaqshylyǵyna qaramastan, bıylǵy jyldyń astyq túrlerine elimizdegi jaǵdaı kóńil kónshiterlik. Jalpy astyq jıyntyǵy 13,5-14,5 mln. tonna kóleminde boljanyp otyr. Ekinshiden, elimizde aldyńǵy egin oraǵynan 7 mln. tonnaǵa jýyq astyq qaldy. Bul kórsetkish 3,4 mln. tonnaǵa, ıaǵnı ótken jylǵa qaraǵanda 2 esege artyq», - dedi A.Kúrishbaev.
Vedomstvo basshysynyń sózine qaraǵanda, osy arqyly atalǵan astyq kólemi ishki naryqtyń qajettiligin tolyǵymen qamtamasyz etýge jáne joǵary eksporttyq áleýetti saqtaýǵa jetkilikti.
«Joǵaryda atalǵan astyq kóleminiń 3,7 mln. tonnasy byltyrǵy jyly «Azyq-túlik» kooporatsııasymen satyp alynǵan astyq bolyp tabylady», - dedi ol.
Mınıstrdiń aıtýynsha, nan baǵasyna unnyń baǵasynyń úlesi 29-35 paıyzdy quraıdy (un suryptaryna baılanysty). Al qalǵany janar-jaǵarmaı, eńbekaqy, sondaı-aq saýda qosyndysyna baılanysty.
«Eske sala keteıik, 2008 jyldyń basynda astyq baǵasy 230-250 AQSh dollaryn qurady. Sol kezde bir bólke nannyń baǵasy respýblıka boıynsha ortasha 46 teńgeden aınaldy. Búginde astyq baǵasy 140-150 AQSh dolaryn quraıdy. Alaıda, nannyń baǵasy aıtarlyqtaı ózgergen joq, ıaǵnı 43 teńgeden», - dep atap ótti mınıstr.
