Jambyl Jabaevtyń 175 jyldyǵyna oraı jyrshy týraly derekti fılm túsiriledi

TARAZ. QazAqparat - Bıylǵy jyl birneshe mereıli dataǵa toly ekeni belgili. Táýelsizdigimizdiń otyz jyldyǵymen birge jyr alyby Jambyl Jabaevtyń 175 jyldyq, malshylardyń marshaly atanǵan Jazylbek Qýanyshbaevtyń 125 jyldyq mereıtoıy qatar kelip otyr, dep habarlaıdy QazAqparat.

Aıtýly datalardy atap ótýdiń is-sharalar jospary oblys ákimi Berdibek Saparbaevtyń qatysýymen ótken jıynda qaralyp, keńinen sóz boldy.

Mádenıet, arhıvter jáne qujattama basqarmasynyń basshysy Erlan Júnisbaı Jambyl Jabaevtyń 175 jyldyq mereıtoıyna oraı atqarylǵan jumystar jaıly habarlama jasap, iske asyrylatyn is-sharalar legi týraly baıandady.

Basqarma basshysy aldaǵy ýaqytta Jambyl Jabaevtyń ómiri men shyǵarmashylyǵyna arnalǵan «Uly dalanyń alyp jyrshysy» derekti fılmi ázirlenetinin, Iran Ǵaıyptyń dramalyq shyǵarmasy sahnalanatynyn, «Jambyldyń salǵan dańǵyly» atty jınaq shyǵatynyn, oǵan tyń dúnıeler enetinin aıtyp ótti.

Basqarma basshysy óz sózinde Jambyl oblysynyń Almaty oblysyndaǵy jáne Almaty oblysynyń bizdiń óńirdegi mádenıet kúnderin joǵary deńgeıde ótkizý maqsatynda birqatar jumystar qolǵa alynyp jatqanyna da toqtaldy.

«Aýdan ákimderi de Jambyl Jabaevtyń 175 jyldyǵyn atap ótýge atsalysýlary kerek. Elimizde Jambyl atyndaǵy aýdan bizdiń óńirde bar ǵoı. Odan bólek bizde birneshe aýyldyq okrýg, 83 kóshe bar eken. Sondyqtan bul mereıtoıdan aqyn atyndaǵy óńirler de syrt qalmasyn»,- dedi Berdibek Saparbaev basqarma basshysyna qaratyp.

Budan soń Jazylbek Qýanyshbaevtyń 175 jyldyǵyna arnalǵan is-sharalar josparynyń oryndalý barysy talqylandy.

Bul týraly oblys ákimdigi ishki saıasat basqarmasynyń basshysy Beıqut Jamangózov baıandama jasady. Ol óz sózinde barlyq jumystar josparǵa sáıkes júrgizilip jatqanyn tolyqqandy aıtyp berdi. Sondaı-aq oblystyq BAQ-ta arnaıy aıdarlar ashylyp, maqalalar berilip, sıýjetter turaqty túrde kórsetilip kele jatqanyn tilge tıek etti. J.Qýanyshbaevtyń mereıtoıy aıasynda týǵan jeri Moıynqum jerinde de kóptegen issharalar, sporttyq jarystar ótkiziletinin sóz etti.

Sondaı-aq, aımaq basshysy Taraz qalasynan Jazylbek Qýanyshbaevtyń esimi beriletin kóshe máselesin de surady. Óz kezeginde tilderdi damytý basqarmasynyń basshysy Rahııa Turmahanbetova tıisti jumystar júrgizilgenin, respýblıkalyq onomastıkalyq komıssııanyń otyrysyn kútip otyrǵanyn jetkizdi.

Jıyn barysynda oblystyq qoǵamdyq keńestiń tóraǵasy Ámzebek Jolshybekov óz usynystaryn jetkizdi. Odan bólek aýdan ákimderi de bul mereıtoılyq is-sharalardyń laıyqty túrde ótýine atsalysatyndyqtaryn jetkizdi.