Jambyl Jabaevtyń 175 jyldyǵyna oraı Jambyl oblysynda 784 shara uıymdastyrylǵan

TARAZ. QazAqparat – Jambyl Jabaevtyń 175 jyldyǵyna oraı Jambyl oblysynda jyl basynan beri 784 is-shara uıymdastyrylǵan. Bul týraly «Uly dala aqyny» atty halyqaralyq konferentsııa barysynda aıtyldy, dep habarlaıdy QazAqparat tilshisi.

Aqyn eskertkishine gúl qoıyp, rýhyna taǵzym etý rásiminen bastalǵan halyqaralyq konferentsııaǵa QR Prezıdenti Ákimshiligi basshysynyń birinshi orynbasary Dáýren Abaev, Mádenıet jáne sport mınıstri Aqtoty Raıymqulova, elimizden jáne Qyrǵyz Respýblıkasynan belgili jazýshy, ǵalymdar, jambyltanýshylar, depýtattar men aqyn urpaqtary barlyǵy 150-ge jýyq adam qatysty.

Konferentsııa barysynda Jambyl oblysynyń ákimi Berdibek Saparbaev tulǵanyń 175 jyldyq mereıtoıyna oraı atqarylyp jatqan aýqymdy sharalarǵa jan-jaqty toqtaldy.

«Elimizde aqyn atymen atalatyn bir ǵana oblys bar. Ol – Jambyl oblysy. Jyr alyby – Jambyl Jabaevtyń esimin enshilegen óńirimizdiń áleýmettik-ekonomıkalyq damýymen qatar, rýhanı-mádenı salasynda da oń ózgerister, atqarylyp jatqan aýqymdy sharýalar az emes. Solardyń birqatary uly jyraýdyń 175 jyldyq mereıtoıyna arnaldy.

Jambyl oblysynda aqyn esimi berilgen 1 aýdan, 3 aýyldyq okrýg, 3 eldimeken, 1 dańǵyl men 83 kóshe, 10 mektep jáne 1 kitaphana bar. Sondaı-aq, óńirde tulǵanyń qurmetine barlyǵy 8 eskertkish ornatylǵan.

Jyl boıy arnalyp 784 is-shara ótti. Munyń bári aqyn esimin keıingi urpaqqa laıyqty túrde tanytyp, onyń rýhanı ómirsheń murasyn keńinen nasıhattaý jolynda atqarylyp jatqan jumystardyń bir parasy ǵana», - dedi aımaq basshysy.

Óz kezeginde Mádenıet jáne sport mınıstri Aqtoty Raıymqulova da el Táýelsizdiginiń 30 jyldyǵymen qatar kelgen uly jyraýdyń mereıtoıyna oraı uıymdastyrylǵan taǵylymdy sharalarǵa toqtaldy.

Basqa da qatysýshylar ózderiniń oramdy oılaryn ortaǵa saldy.