Jambyl Jabaevqa arnalǵan 10 tomdyq jınaqtyń tusaýy kesildi
Sharaǵa QR Memlekettik hatshysy Qyrymbek Kósherbaev, QR Mádenıet jáne sport mınıstri Aqtoty Raıymqulova, QR Parlamentiniń Senat jáne Májilis depýtattary, qoǵam qaıratkerleri men ǵalymdar, zııalyq qaýym ókilderi qatysty.
Sharanyń ashylýynda sóz sóılegen Memlekettik hatshy Qyrymbek Kósherbaev bul jınaqtyń mańyzyna toqtaldy.
«Biz búgin uly Jambyldyń 175 jyldyq mereıtoıy aıasynda memlekettik tapsyrys arqyly jaryqqa shyqqan 10 tomdyq jınaqtyń tusaýkeser rásimne jınalyp otyrmyz. Uly jyraýyń sońynda qalǵan soqtaly shyǵarmalaryn ulttyń ıgiligne jaratyp, keler urpaqqa jetkizý biz úshin ulaǵatty paryz, asyl amanat. Mereıtoı jylynda aqyn shyǵarmalaryn nasıhattap, halyqqa jetkizýde respýblıka kóleminde kóptegen mádenı is-sharalar júrgizilýde. Solardyń biri memlekettik komıssııa qabyldaǵan sheshimniń aıasynda jaryq kórgen osy kóptomdyqtar der edim, - dedi Qyrymbek Kósherbaev.
Tusaýy kesilgen 10 tomdyqqa Jambyl Jabaevtyń ótken ǵasyrdyń basynan bastap dúnıe salǵanǵa deıingi barsha óleńderi men aıtystary, jyrlary toptastyrylǵan. Sondaı-aq, aqyn shyǵarmashylyǵyna qatysty ǵalymdardyń ǵylymı zertteýleri, kórnekti aqyn-jazýshylardyń estelikteri de engen.
«Búgin tusaýy kesilip otyrǵan 10 tomdyq jınaq jambytanýǵa qosylǵan úlken úles, halqymyzdyń rýhanı qazynasyn molaıtqan irgeli eńbek dep esepteımiz. Jyr alyby Jambyldyń búkil murasy, onyń ómiri men shyǵarmashylyǵy týraly estelikter men ǵylymı zertteýler, Jambyl bıblıografııasy tuńǵysh ret tolymdy basylym retinde jaryqqa shyqty», - degen Memlekettik hatshy týyndynyń qazaq halqynyń rýhanııatyna qosylǵan taǵy bir qundy mura bolatynyna senim bildirdi.
