«Jambyl Jabaev - Uly dalanyń alyp jyrshysy» atty halyqaralyq konferentsııa ótti
ASTANA. QazAqparat - Bıyl halyq aqyny, jyraýlyq ónerdiń sheberi, aıtysker Jambyl Jabaevtyń týǵanyna 170 jyl. Aıtýly dataǵa oraı búgin Qazaq memlekettik qyzdar pedagogıkalyq ýnıversıtetinde Almaty qalasynyń, Almaty oblysynyń ákimdikteriniń jáne L.Gýmılev atyndaǵy Eýrazııa ulttyq ýnıversıtetiniń uıymdastyrýymen jyr alyby J.Jabaevtyń qurmetine arnalǵan «Jambyl Jabaev - Uly Dalanyń alyp jyrshysy» atty halyqaralyq ǵylymı-teorııalyq konferentsııa ótti.
Bul týraly Qazaq memlekettik qyzdar pedagogıkalyq ýnıversıtetiniń baspasóz qyzmetinen habarlady.
Halyqaralyq konferentsııany Almaty qalasy ákiminiń orynbasary Arman Qyryqbaev ashty. Ol alǵy sózinde búgingi sharanyń máni men mańyzyn atap ótip, qala basshysy B.Baıbektiń quttyqtaý hatyn oqyp berdi. Uly Dalanyń alyp jyrshysy J.Jabaevtyń 170 jyldyǵy Almaty qalasynda da óz deńgeıinde atap ótiletinin jetkizgen A.Qyryqbaev: «Aqynnyń mol murasy bolashaq urpaq úshin baǵa jetpes qazyna», - dedi.
Basqosýdyń plenarlyq májilisinde sóz alǵan qoǵam jáne memleket qaıratkeri, belgili ǵalym, jazýshy Myrzataı Joldasbekov: «Este joq eski zamandardan bergi el tarıhynyń kórkem shejiresin jasaýshylar da, onyń saqtaýshylary da aqyn-jyraýlar. Ǵasyrdan ǵasyrǵa ulasyp, atadan urpaqqa mıras bolyp jalǵasqan qazaq sóz óneriniń aıshyqty bir salasyn telegeı-teńiz jyr týdyrǵan sol aqyn-jyraýlar quraıdy. Qazaq jyraýlary tarıhty túpten taratyp aıtatyn shejireshiler, mıllıondaǵan jyr joldaryn jadynda saqtaı alatyn qudiretter, Uly dalanyń kóshpeli akademııasy. Baıtaq qazaq dalasyn jyrǵa keneltken, osy bir teńdesi joq bıik ónerdi bıikke kótergen dańǵyl jyraýlardyń eń sońǵy úzdigi Jambyl. Ol epık ári aıtys aqyny, abyz jyraý, jaýynger jyrshy, shyn maǵynasyndaǵy zańǵar poezııany jasaýshylardyń eń ulysy. Jambyldyń qudireti asqan sheberligimen ǵana emes, halyq poezııasynyń butaq jaıǵan alyp báıteregi bolýymen de, halyq aqyndarynyń jańa kóshin bastaǵan darabozdyǵymen de álemdi tań qaldyrǵan bolatyn», - dep atap ótti.
Sondaı-aq, ǵalymdar konferentsııada jambyltaný baǵytynda elimizde jasalyp jatqan ǵylymı-tanymdyq zertteý jumystary jóninde, halyq poezııasynyń atasy atanǵan Jambyldyń dańǵyl jyraýlyǵy, uly aıtyskerlik murasy, kúıshilik, jyrshylyq óneri, ǵajap áńgimeshildigi, baıtaq shejireshildigi men aqyn jyrlarynyń sheberligi jaıynda sóz qozǵap, aqynnyń ómiri men shyǵarmashylyǵyn ádebıettaný, til bilimi jáne ádistemelik qyrynan jan-jaqty qarastyrdy.
Shara aıasynda Erlan Sydyqovtyń «Jambyl» atty kitabynyń tusaýy kesildi. Avtor bul kitapty Jambyl Jabaevtyń týǵanyna 170 jyldyǵyna jáne Uly Jeńistiń 70-jyldyǵyna oraı arnaıy shyǵarǵanyn atap ótti.
Plenarlyq májilistiń sońy shaǵyn kontserttik baǵdarlamaǵa ulasty. Ómiri óleń jyrmen órnektelgen, óneri el-besikte terbetilgen, jyr juldyzy Jambyl babamyzdyń rýhyna arnalǵan kontsertte belgili aıtysker aqyn Serik Qalıev «Jambylǵa arnaý» óleńimen jyrdan shashý shashsa, elimizge tanymal bala Jambyl aqyn óleńderi men sııasy keppegen jańa týyndylaryn tartý etti. Jambyl shyǵarmashylyǵynyń shashasyna shań juqtyrmas, oza shaýyp báıge alǵan bir salasy aıtys óneri de bul keshte sahnalandy. Jambyl men Aıkúmistiń aıtysyn beıneleıtin kórinis kópshilik kóńilinen shyqty. Sonymen qatar, kontsertte aqynnyń súıikti án-jyrlary shyrqaldy.
