Jambyl polıtseıleri Telegram jelisi arqyly birneshe ret alaıaqtyq jasaǵan kúdiktini ustady

TARAZ. QazAqparat – Jambyl oblystyq polıtsııa departamentiniń «Kıberpol» arnaıy bólinisiniń jáne Sarysý APB qyzmetkerleri ınternet alaıaqtyq boıynsha birneshe ret qylmys jasaǵan er adamdy ustady, dep habarlaıdy QazAqparat tilshisi.

Áleýmettik jeli arqyly qolma-qol aqsha sheship berýge ýáde etken Qyzylorda oblysynyń 25 jastaǵy turǵynynan zańsyz áreketterdi júzege asyrǵan eki uıaly telefon tárkilendi.

Internet alaıaqtyqty turaqty tabys kózine aınaldyra otyryp, «Jańatas-Saýda» telegramm toby arqyly kúdikti azamattarǵa paıyzsyz bólip tóleýge 8 paıyzben aqshalaı qarajatty qolma-qol aqshaǵa aınaldyrýǵa ýáde bergen.

Jábirlenýshiler alaıaqqa qashyqtan tólengen shottar boıynsha QR kody arqyly onlaın tólem jibergen. Osydan keıin alaıaq rekvızıtterdi paıdalanyp, jeke kásipkerdiń ártúrli shottarynan aqsha alǵan.

Oblystyq polıtsııa departamenti baspasóz qyzmetiniń habarlaýynsha, ustalǵan azamat ınternettegi alaıaqtyqtyń 5 deregi boıynsha kúdikke ilingen. Jalpy keltirilgen zalal kólemi – 4 mln 500 myń teńge. Atalǵan derekke qatysty QR QK 190-babynyń 2-bóligi, ıaǵnı alaıaqtyq boıynsha sotqa deıingi tergeý amaldary bastalǵan.

Qazir kúdiktiniń basqa da osyǵan uqsas qylmystarǵa qatysy anyqtalyp jatyr. Іstiń mán-jaıyn anyqtaý úshin qajetti jedel tergeý is-sharalary júrgizilip jatyr.

Buǵan deıin Jambyl oblysynda aýyzsýǵa bólingen qarjyny jymqyrǵan sheneýnikter sottalǵanyn habarlaǵan bolatynbyz.