Jambyl óńiriniń damýy burynǵymen salystyrǵanda jer men kókteı - QR Prezıdenti
«Osy kezderde eldi aralap, óńirlerdiń jaǵdaıymen tanysyp, eldiń oıyn bilý men úshin saltqa aınalǵanyn bilesizder. Sol jolmen Ózbekstan, Túrikmenstanǵa saparymnan kele jatqanda jolshybaı sizderge soǵyp, jaǵdaıdy bileıin dep keldim. Búgin qalany aralap, ishin, jasalyp jatqan jumystardy kórdik», - dedi Elbasy.
Qazaqstan Prezıdenti Jambyl oblysy óndiris oshaqtaryn kóbeıtýi qajettigin basa aıtty. Óndiris oshaqtarynyń sany artsa, ekonomıkanyń aýqymy eselenip, bıýdjetke túsetin qarajattyń molaıatyndyǵyn, halyqtyń jaǵdaıy jaqsaratyndyǵyna nazar aýdartty.
«Nurly jer» baǵdarlamasy aıasynda jańadan móltek aýdandar salynyp jatqanyn kórip otyrmyn. Jol salynyp jatyr. Jambyldyń ústimen qazir Batys Eýropa-Batys Qytaı kólik dálizi salyndy. Temir jol bar, gaz qubyry tartylyp, barlyǵy gazdandyryldy. Burynǵymen salystyrǵanda jer men kókteı boldy. Tarazdyń ishindegi mashınalardyń sanyn qarasań, sonyń ózi halyqtyń ál-aýqatynyń kóterilgendigin bildiredi. Sonyń barlyǵy eldiń ishindegi tynyshtyqtyń, bizdiń aýyzbirshiligimizdiń arqasynda bolyp otyr. Árıne, oblysta jumystar jasalyp jatyr. Ákimdikter ózderiniń jumystaryn atqarýda. Biraq isteıtin sharýalar da kóp», - dedi Nursultan Nazarbaev.
Osydan keıin óńir basshysy Kárim Kókirekbaev Jambyl oblysynyń damýy jaıynda baıandama jasady.
