Jambyl óńirine et ónimderin shyǵarýǵa 6,5 mlrd. teńge ınvestıtsııa salýǵa daıyn 5 ınvestor keldi - K.Kókirekbaev

TARAZ. QazAqparat - Jambyl óńirine et ónimderin shyǵarýǵa 6,5 mlrd. teńge ınvestıtsııa salýǵa daıyn 5 ınvestor keldi. Bul týraly búgin «Memleket basshysynyń 5 ınstıtýttyq reformasyn júzege asyrý boıynsha 100 naqty qadam» Ult josparyn júzege asyrý máselelerine arnalǵan brıfıng barysynda Jambyl oblysynyń ákimi Kárim Kókirekbaev málim etti.

«Oblysqa iri qara mal eti men taýyq etin óndirý jáne qaıta óńdeýdi damytý úshin jalpy ınvestıtsııa kólemi 6,5 mlrd. teńgeni quraıtyn 5 iri ınvestor tartyldy», - dedi K.Kókirekbaev.

Óńir basshysy derekterine sáıkes, «Halal» standartymen 1757 tonna et ónimderin shyǵaratyn óndiris orny Jambyl aýdanynda ashylady. «OńtústikHalalTaǵamdary» seriktestigi júzege asyratyn jobaǵa Birikken Arab Ámirliginiń «ADEAS Development» kompanııasy ınvestıtsııa quıatyn bolady. Joba quny 2,5 mlrd. teńgeni qurasa, búginde onyń 1,8 mlrd. teńgesi tolyǵymen ıgerilgen.  

«Agrostanferms» JShS malaızııalyq ınvestorlardyń kómegimen Merki aýdanynda 3 myń bas iri qaraǵa arnalǵan bordaqylaý ornyn salmaq. Investıtsııa kólemi shamamen 10 mln. dollarǵa teń. «Agro fırma Týrikpen» JShS-i de 3 myń iri qaraǵa arnalǵan bordaqylaý keshenin salyp, 5 myń bas iri qaraǵa arnalǵan mal tuqymyn asyldandyrý sharýashylyǵyn qurmaq. Bul jobanyń quny shamamen 500 mln. teńgeni quraıdy.