Jambyl óńirinde jyl saıyn 5 myń ga jerge orman aǵashtary egiledi
TARAZ. QazAqparat -Jambyl oblysyndaǵy orman qorynyń aýmaǵy óńirdiń 30,8 paıyzyn alyp jatyr desek, búginde bul kórsetkish artyp keledi. Óıtkeni munda jyl saıyn memlekettik orman qory aýmaǵyndaǵy 5000 ga jerge orman aǵashtary egilýde, - dep habarlaıdy QazAqparat.
Bul týraly búgin Óńirlik kommýnıkatsııalar ortalyǵy alańynda ótken brıfıngte oblys ákimdiginiń tabıǵı resýrstar jáne tabıǵat paıdalanýdy retteý basqarmasynyń basshysy Nurjan Nurjigitov aıtty.
Spıkerdiń sózinshe, 2018 jyly kóktemde 1800 ga alqapqa orman aǵashtary kóshetimen otyrǵyzyldy. Sondaı-aq, kúz aıynda 3000-nan asa ga alqapqa sekseýil tuqymy sebilgen.
Sondaı-aq, janýarlar dúnıesin qorǵaý, ósimin molaıtý is-sharalaryna bólingen 20 074 myń teńge qarjy 100 paıyzǵa ıgerilip, josparlanǵan jumystar tolyǵymen atqaryldy.
Onyń ishinde Jýaly, Talas, Jambyl aýdandarynyń aýmaqtarynda «Jýaly-Qarashat» jáne Qordaı men Shý aýdandarynyń aýmaǵynda «Qordaı-Jaısan» memlekettik tabıǵı (zoologııalyq) qaýmaldaryn qurý úshin jer ýchaskeleri rezervilendi. Qazirgi ýaqytta rezervilengen jer ýchaskelerinde qaýmal qurý týraly oblys ákimdiginiń qaýlysynyń jobalary ázirlenip, tıisti memlekettik organdarmen jáne qoǵamdyq uıymdarmen kelisilýde.
«Ormandy alqaptyń kólemin arttyrýda aǵash otyrǵyzý jumystarymen qatar, órtterdiń aldyn alý sharalary da mańyzdy. Bul oraıda, qazirgi tańda orman sharýashylyǵy mekemeleriniń materıaldyq-tehnıkalyq bazasy 52,2 paıyzdy qurap otyr. 2018 jyly Memlekettik mekemelerdiń materıaldyq-tehnıkalyq bazalaryn jaqsartý maqsatynda jergilikti bıýdjetten - 235 mln.teńge bólinip, qajetti quraldar alyndy. 2019 jylǵa oblystyq bıýdjetten 130,0 mln. tenge bólinip, oǵan orman sharýashylyǵy mekemelerine qajetti tehnıkalar alý josparlanýda»-deıdi basqarma basshysy.
Aıta keteıik, óńirde aǵymdaǵy jyly kóktemde 2000 ga alqapqa orman ekpelerin kóshetimen otyrǵyzý josparlanýda. Sonymen qatar, kúz aıynda tuqym sebý jumystary da tıisinshe júrgizilmek.
