Jambyl óńirinde oblystyq deńgeıdegi 7 basshyǵa qylmystyq is qozǵalǵan
NUR-SULTAN. QazAqparat - 2020 jyldyń 11 aıynda Jambyl oblysynda 121 sybaılas jemqorlyq qylmysy tirkeldi. Bul týraly QR Sybaılas jemqorlyqqa qarsy is-qımyl agenttigi Jambyl oblystyq departamentiniń basshysy Ádilhan Áshirbaev aıtty, dep habarlaıdy QazAqparat tilshisi.
«Elimizde qalyptasqan epıdemıologııalyq jaǵdaıǵa qaramastan oblystaǵy sybaılas jemqorlyqqa qarsy qyzmet Memleket basshysy men agenttik tóraǵasynyń tapsyrmasyna oraı barlyq qajetti sharany qabyldap jatyr. Agenttiktiń jańa talaby - sybaılas jemqorlyqqa qarsy qyzmettiń jumysyn sannan sapaǵa aýystyrý. Departament jumysyn osy baǵytta jalǵastyrýda. Aldyn alý is-sharalarymen qatar turaqty negizde jedel izdestirý jáne tergeý qyzmetin júrgizip jatyrmyz. Nátıjesin qysqasha aıtar bolsam, osy jyldyń 11 aıynda departament 121 qylmystyq isti tirkedi. Bul byltyr tirkelgen qylmystyq ister sanynan birshama az bolǵanymen aýyr sanattaǵy qylmys sany kóbeıip otyr. Bıyl 84, al ótken jyly 72 aýyr qylmys tirkelgen edi», - dedi ol.
Onyń aıtýynsha, sybaılas jemqorlyqtyń júıeli túri boıynsha 7 qylmys tirkelse, memlekettik baǵdarlamalar aıasynda bólingen qarajattardy urlaý faktisimen 16, shaǵyn jáne orta bıznes jumysyna zańsyz aralasý boıynsha 9 derek tirkelgen.
«Departament jumysynyń nátıjesinde 80-ge jýyq kásipkerdiń quqyǵy qorǵaldy. Munan basqa departament memlekettik organdardyń jáne kvazımemlekettik sektordyń basshylary tarapynan jasalǵan sybaılas jemqorlyq faktilerin anyqtaý jumystaryn atqaryp jatyr. Atap aıtqanda, bıyl oblys deńgeıindegi basshylarǵa qatysty 7 qylmys tirkelip otyr. Byltyr 3 qylmystyq is tirkelgen bolatyn. Olardyń ishinde oblys ákimdigi basqarmalarynyń 4 basshysyna, 1 kvazımemlekettik mekeme basshysyna jáne óńirlik departamentterdiń 2 basshysyna qatysty qylmystyq is qozǵaldy. Buǵan qosa, 7 qylmys qala, aýdan deńgeıindegi basshylarǵa qozǵalsa, 4 qylmys aýdandyq okrýgterdiń ákimderine qatysty tirkeldi», - dedi departament basshysy.
Ádilhan Áshirbaevtyń atap ótýinshe, búginde 105 is sotqa joldandy. 8 is qysqardy. Jasaǵan zańsyz is-áreketi úshin 70 tulǵa qylmystyq jaýapkershilikke tartyldy.
«Tirkelgen qylmystyq ister boıynsha 827 mln teńge kóleminde zalal keltirilgen bolsa, onyń 600 mln teńgeden astamy óndirip alyndy. 160 mln teńgeniń múlkine tyıym salyndy. Budan basqa syıbaılas jemqorlyq derekteri týraly habarlaǵan azamattardy kótermeleý bóliginde atqarylǵan aldyn alý jumystarynyń nátıjesinde jyl basynan beri 30 azamatqa 4,8 mln teńge kóleminde syıaqy tólendi», - dedi ol.
