Jambyl oblysynyń jerin Qaraǵandy oblysyna berý usynyldy
«Osy depýtattyq saýalmen júginýdiń sebebi Jambyl oblysy Moıynqum aýdanynda jerdiń bir bóligin Qaraǵandy oblysynyń Prıozersk qalasyna berý týraly máselege qatysty. Ózderińiz biletindeı, Prıozersk qalasy Balqash kóliniń jaǵasynda, Qaraǵandy oblysynyń ońtústik bóliginde ornalasqan. 1956 jyly salynǵan qalanyń ońtústik shekarasy ońtústik endiginiń 46-shy paralelinen ótedi. Sondyqtan qalanyń mańaıy eki oblystyń qaramaǵyna qaraıdy. Atalǵan shekara 1932 jyly avtomatty túrde júrgizilip, búgingi kúnniń áleýmettik-ekonomıkalyq talabyna saı emes ekendigine sebepter jeterlik»,-dedi ol Senattyń jalpy otyrysy barysynda.
Júrgizilgen shekara Prıozersk qalasynyń mańynda ornalasqan kóptegen nysandardy eki oblystyń ákimdikteriniń qaramaǵyna qaratty. Mundaı ákimshilik bólý eki oblystyń azamattaryna, kásipkerleri men memlekettik organdaryna kúndelikti ómirde kóptegen qıynshylyqtar týdyrýda.
«2015 jyly Balqash kóliniń jaǵasynda emdeý-saýyqtyrý kesheni paıdalanýǵa berildi. Eń qyzyǵy, eki oblys aralyǵynan ótip jatqan shekaranyń yńǵaısyzdyǵynan shıpajaı 360 shaqyrym qashyqtyqta ornalasqan Jambyl oblysy Moıynqum aýdanynyń quzyryna qarasty»,-dep toqtaldy senator.
Onyń sózinshe, osy atalǵan shıpajaı ǵana emes, sonymen qatar Prıozersk qalasyna qarasty basqa da nysandar Jambyl oblysy aýmaǵyna kirip otyr.
«Atalǵan máseleden týyndaıtyn problemalar kóp. Prıozersk qalasynyń mańynda turatyn Moıynqum aýdanynyń turǵyndaryna jáne kásipkerlerine qajetti ruqsat berýshi qujattardy rásimdeý úshin 360 shaqyrym qashyqtyqta ornalasqan Moıynqum aýdandyq ortalyǵyna bir emes, birneshe barýǵa týra keledi. Memlekettik organdarymyz úshin salyq tóleý kezinde tólemderdi bólýde qıyndyqtardy týdyrady. Sondaı-aq Moıynqum aýdanynyń jerlerin paıdalaný úshin jalǵa alý tólemderi boıynsha qosymsha shyǵyndarǵa alyp kelip soqtyrady. Kórsetilgen máselelerdi sheshý úshin 527,3 gektar jer telimin Jambyl oblysy Moıynqum aýdanynan Qaraǵandy oblysynyń Prıozersk qalasyna berý usynylady»,-dedi Aqylbaı.
