Jambyl oblysynyń turǵyny saqardan emdik sabyn jasaıdy

TARAZ. QazAqparat - Jambyl oblysy Rysqulov aýdany Qaıyńdy aýylynyń turǵyny túrli shópter men aǵashtardan sabyn jasap shyǵarady. Aýyl turǵyndarynyń aıtýynsha, Ardaq Kámiljanqyzynyń ónimi - jaı sabyn emes, emdik sabyn. Qytaıdan kelgen qandasymyz sabyn ǵana emes, túrli jýý quraldaryn da qoldan jasap otyr, dep jazady QazAqparat tilshisi.

Qazir naryqta sheteldik kompanııalardyń «quramy ekologııalyq taza» dep jazylǵan, jarnamasy jer jaratyn túrli sabyndary, tazartqysh jáne jýý quraldary óte kóp.

Biraq quny sharyqtap tur. Osy turǵydan alǵanda Qaıyńdyda óndirilgen gıgıenalyq quraldardyń bási bıik. Óıtkeni, sapasy joǵary, baǵasy qoljetimdi.

«Biz Qytaıdan kelgen qazaqpyz. Bilesizder, ol jaqta emshilik, shıpagerlik, halyq medıtsınasy óte jaqsy damyǵan. Medıtsına salasynda ósimdikter men shópter kóptep qoldanylady. Men sol jaqta sabyn shyǵaratyn zaýytta jumys istedim. Tájirıbe jınaqtaı júrip, ondaǵy mamandardan ár aǵash pen shóptiń emdik qasıeti jóninde surastyryp, ábden izdendim. Sol bilimim men tájirıbemdi Otanyma oralǵan soń el ıgiligine paıdalanǵandy jón kórdim. Qazaqstanǵa oralǵanymyzǵa kóp bola qoıǵan joq. Aýdannyń taýǵa jaqyn ornalasqan Qaıyńdy aýylyna qonystanyp, úıden shaǵyn tseh ashtym. Munda joq ósimdikterdi Qytaıdan aldyrtamyn», - deıdi sheber.

Onyń aıtýynsha, jýý quraldaryn jasaýǵa eń qajettisi – saqar. Ertede ájelerimiz kir jýatyn qara sabyndy saqardan jasaǵan.

Áli de el ishinde qoldan qara saqar sabyn jasaıtyndar bar. Ol óte paıdaly, teri aýrýlaryna emi bar jáne eshqandaı allergııa týdyrmaıdy.

Ony daıyndaý úshin Ardaq Kámiljanqyzy aldymen sary qýraıdyń saqaryna záıtún maıyn qosyp qaınatady. Sosyn mıneraldy tuz qosady.

«Munda qaınaýynyń ózine mán berý kerek, qatty burqyldamaı, jaı, baıaý otta terbetile qaınaǵany durys. Odan soń qolǵa arnalǵan maı, terige paıdaly dárýmender suıyqtyǵyn jáne zııansyz kópirtkish qosamyn. Daıyn bolǵan kezde jyldamdatyp qalypqa quıamyn. Ár sabynǵa paıdalaný maqsatyna qaraı jemjemil, kókemaral, adyraspan, aloe, qııar, qart qaraǵaı sekildi ósimdikterdi qosamyn. Onyń bireýi shash túsýin toqtatsa, ekinshisi ishtegi sýyqty, jeldi ketiredi, taǵy biri teri aýrýlaryna em. Baldan jasalǵan túrin kóbine áıel adamdar bet kútimi úshin alady. Ol sozylǵan terini jınaqtap, túsin aǵartady. Ár ósimdikten alynǵan sabynnyń tústeri de ártúrli bolyp shyǵady. Eshqandaı allergııa týdyrmaıtyn, zııany joq, negizgi qospalardan qaınatylǵan suıyqtyqty ydys jýýǵa arnap ázirleımin. Onymen tek ydys qana emes, kókónis, jemis-jıdekti de jýyp, zalalsyzdandyrýǵa bolady», – deıdi Ardaq.

Baıqaǵanymyz, jas kásipker óz isinde qazaqy qundylyqtarǵa basa mán beredi.

Ónimderiniń qorabyndaǵy aqparattar da tek qazaq tilinde jazylǵan.

Qandasymyz ekologııalyq jýý quraldaryn óndirýdiń qazaqy brendin qalyptastyrǵysy keletinin de aıtyp qaldy.

Ázirge onyń tutynýshylary bul ónimderdiń qasıetin biletin shaǵyn ǵana orta bolyp otyr.

Kóbine Almaty óńirindegi syrttan kelgen qandastar kóptep tapsyrys berip, satyp alady. Sosyn ónimdi paıdalanyp, áserin baıqaǵan - aýyldaǵy turǵyndar.

«Ázirge tapsyryspen ǵana shyǵaryp otyrmyn. Kóptep shyǵarýǵa qol kúshi az bolyp tur. Eger qajetti apparattardy alsam, árqaısysyna eki adamnan jumysshy jaldar edim. Sebebi, bir adam shıkizatty quıyp tursa, ekinshisi daıyn bolǵan ónimdi qalypqa quıýy kerek. Sonda ónimdilik te artady. Az ǵana ázirlesem de, qazirdiń ózinde suranys joǵary, sebebi baǵasy qoljetimdi. Mysaly, 400 gramdyq qutyǵa quıylǵan ydys jýatyn suıyqtyqty 600 teńgeden satyp jatyrmyn. Bir qutysy eki aı paıdalanýǵa jetedi. Al, emdik sabyn 1 myń teńgeden», – deıdi Ardaq Kámiljanqyzy.

Ázirge mashaqaty kóp bul jumystyń bárin Ardaq jalǵyz ózi atqaryp júr.

Eger qaınatpany daıyndaıtyn qurylǵylar alsa, shaǵyn tsehyn keńeıtip, shash jýýǵa arnalǵan sýsabyn men balzamnyń da ekologııalyq taza túrlerin óndirgisi keledi.

Alaıda, oǵan qarjylaı qoldaý qajet.

Eske sala keteıik, buǵan deıin taqııa tigetin tarazdyq sheber týraly jazǵan bolatynbyz