Jambyl oblysynyń turǵyny polıtseıge pyshaq suǵyp aldy
TARAZ. QazAqparat – Jambyl oblysynyń turǵyny mas kúıinde polıtseıge pyshaq suǵyp aldy. Bul týraly oblystyq polıtsııa departamentiniń baspasóz qyzmeti habarlady, dep habarlaıdy QazAqparat.
Jambyl oblysy Jambyl aýdandyq polıtsııa bóliminiń ýchaskelik ınspektory aǵasy men inisi arasyndaǵy otbasylyq janjal týraly túsken habarlama boıynsha tıisti mekenjaıǵa barǵan. Oqıǵa Tastóbe aýylynda bolǵan.
«Aýyl turǵyny mas kúıinde polıtsııa qyzmetkerine as úı pyshaǵyn suǵyp aldy. Sýyq qarý polıtsııa qyzmetkeriniń bronejıleti bolǵandyqtan denesine ótpegen. Ustalǵan 49 jastaǵy er adam óz kinásin moıyndap, Taraz qalasynyń tergeý ızolıatoryna qamaqqa alyndy. Atalǵan derek boıynsha Qylmystyq kodekstiń 380-baby 3-bóligi 9-tarmaǵy boıynsha sotqa deıingi tergeý júrgizilýde», - delingen vedomstvo habarlamasynda.
