Jambyl oblysynyń trassasynda júk kólikteri aýdaryldy

TARAZ. QazAqparat – Batys Eýropa – Batys Qytaı avtojolynyń Jambyl oblysy aýmaǵyndaǵy ýchaskesinde birden birneshe jol-kólik apaty boldy, dep habarlaıdy QazAqparat tilshisi.

Jambyl oblysy Polıtsııa departamentinen málim etkendeı, kóktaıǵaq pen joldyń nashar kórinýinen jol apattaryna 7 kólik túsken.

Birneshe júk kóligi joldyń taıǵaqtyǵy saldarynan aýdarylǵan.

«Jol-kólik apattarynda zardap shekken adamdar joq. Oqıǵalar tekserilip jatyr», - dedi vedomstvodan.

Aıta keteıik, Jambyl oblysynda aýa raıynyń buzylýy baıqalýda – qar, kóktaıǵaq jáne tuman. Qardyń mol túsýine baılanysty polıtseıler óńir aýmaǵynda kúsheıtilgen qyzmet rejımine kóshti.