Jambyl oblysynyń Talas aýylyna taza aýyz sý jetti
TARAZ. QazAqparat – Jambyl oblysy Baızaq aýdanyndaǵy Talas aýylyna taza aýyz sý qubyryn tartý jumystary aıaqtalyp, el ıgiligine berildi, dep habarlaıdy QazAqparat tilshisi.
Ótken jyldyń sáýir aıynda aýdan ákimdigi sáýlet, qala qurylysy jáne qurylys bóliminiń tapsyrysy negizinde qolǵa alynǵan jumysty merdiger «SK-AVS» jaýapkershiligi shekteýli seriktestigi atqarǵan. Jalpy somasy 638,4 mln teńgeni quraǵan qurylys barysyn «ZeınGrýpp» jaýapkershiligi shekteýli seriktestigi tehnıkalyq, al «Tabys Joba» jaýapkershiligi shekteýli seriktestigi avtorlyq turǵydan qadaǵalaǵan.
Sharanyń saltanatty ashylýyna qatysqan aýdan ákiminiń orynbasary Qaırat Ismaıl jergilikti jurtshylyqty aıtýly oqıǵamen jáne Táýelsizdik merekesimen quttyqtady.
«Búginde, aýdan boıynsha 43 eldi mekenniń 20-sy taza aýyz sýmen qamtamasyz etilgen. Bul, bar bolǵany 46,5 paıyzdy ǵana quraıdy. Mine, Talas aýyly 21-inshi aýyl bolyp, taza aýyz sýǵa qol jetkizip otyrsa, jyl sońyna deıin Qostóbe aýyly da sapaly tirshilik nárine qol jetkizedi. Sol sekildi Seńkibaı, Jańaturmys, Býryl aýyldarynda qaıta jańǵyrtý jumystarynan soń taza aýyz sý júıeleri qaıta iske qosylatyn bolady», — dedi Q.Ismaıl.
Óz kezeginde aýyl turǵyndary atynan aýyldyq ardagerler keńesiniń tóraǵasy Mamed Sýleımanov sóz alyp, bıylǵy jylda aýyldyq okrýgtegi oń ózgeristerdi atap shyqty.
Dástúrge saı, aýyz sý ǵımaratynyń lentasy qıylyp, sý qondyrǵylary iske qosyldy. Kelgen qonaqtar eki júz metr tereńdikten tartylyp alynyp, súzgiden ótetin taza aýyz sýdyń dámin tatty.
Aıta keteıik, jalpy, Talas aýyly boıynsha sý qubyry jelisiniń uzyndyǵy 19 shaqyrymdy qurasa, ol arqyly 591 aýla taza aýyz sýmen qamtylatyn bolady. Jergilikti turǵyndar arasynan «Baızaq Sý» kommýnaldyq memlekettik kásiporny arqyly 3 mashınıst jáne 1 baqylaýshy retinde turaqty jumysqa qabyldanǵan.
