Jambyl oblysynyń shalǵaı aýdandaryna «Mobıldi emhana» attandy

TARAZ. QazAqparat – Jambyl oblysynda «Mobıldi emhana» jobasy basta. Jobanyń maqsaty – árbir eldimekende, onyń ishinde shalǵaı jatqan aýyl-aımaqta medıtsınalyq kómektiń qol jetimdiligin qamtamasyz etý, - dep habarlaıdy QazAqparat tilshisi.

Memleket basshysy Qasym-Jomart Toqaev Joldaýynda barlyq aýyldardy feldsherlik-akýsherlik pýnktermen jáne dárigerlik ambýlatorııalarmen jabdyqtaý qajettigin atap ótti. Jambyl oblysynda sońǵy 5 jylda aýyldyq jerlerde 120 túrli medıtsınalyq nysan paıdalanýǵa berildi desek, taǵy 68 medortalyq salynady.

«Oblys halqynyń 60 paıyzy aýylda turatynyn eskersek, aldymyzda ár eldimekende medıtsınalyq kómektiń qol jetimdiligin qamtamasyz etý mindeti tur. Medıtsınalyq qyzmettiń mobıldi túri aýyldaǵy densaýlyq saqtaý salasynyń tıimdi damýyna yqpal etedi. Oblysta úsh jyljymaly mobıldi keshen bar, jyldyń aıaǵyna deıin taǵy 8 jyljymaly keshen satyp alý josparlanyp otyr», - dep atap ótti oblys ákiminiń orynbasary Erjan Jylqybaev.

Aldaǵy bir aptada S.Asfendııarov atyndaǵy QUMÝ mamandary, medıtsına ǵylymdarynyń doktory, dotsentterden quralǵan 3 dárigerlik brıgada Sarysý, Talas, Moıynqum aýdandarynyń shalǵaıdaǵy eldimekenderiniń turǵyndaryna konsýltatıvtik mamandandyrylǵan kómek kórsetedi. Brıgadalar terapevt, pedıatr, kardıolog, ÝZD (ÝZI), nevropatolog, onkolog jáne akýsher-gınekologtardan jasaqtalǵan.

Sondaı-aq, oqý ornynyń ustazdary aýyldaǵy medıtsına qyzmetkerlerine koronavırýs ınfektsııasynyń ekinshi tolqynyna baılanysty ádistemelik kómek kórsetpek.

Joba Jambyl oblysy ákimdigi men atalǵan ýnıversıtet arasynda jasalǵan eki jaqty memorandým aıasynda iske asýda. Shalǵaıdaǵy eldi mekenderdegi turǵyndarǵa mundaı medıtsınalyq kómek kórsetý josparly túrde jalǵasatyn bolady.