Jambyl oblysynyń polıtseıleri jyl basynan beri 210 qarý tárkiledi

TARAZ. QazAqparat - Jambyl oblysynyń polıtsııa departamentiniń qyzmetkerleri qańtar oqıǵasy kezinde urlanǵan jáne zańsyz saqtalǵan qarýlardy izdep, tárkileý jumystaryn áli de jalǵastyrýda, dep habarlaıdy QazAqparat tilshisi.

«Jyl basynan beri polıtsııa 210 qarý tárkiledi, onyń 37-si 2022 jyldyń qańtar aıynda polıtsııa departamenti qoımasynan urlanǵan. Sondaı-aq, osy ýaqyt aralyǵynda 3674 oq-dári alyndy. Qarý-jaraqtyń negizgi bóligi jasyryn kómilgen oryndardan anyqtaldy.

Máselen, bıyl 9 mamyrda Taraz qalasyndaǵy zırattan qarý-jaraq tabyldy. Polıtseıler 16 kalıbrli «IK-18» markaly bir uńǵyly, 16 kalıbrli «700 ATM-Ý» markaly eki uńǵyly ańshy myltyqtaryn jáne «MR-79-9 MT» travmatıkalyq myltyǵyn tárkiledi.

Taǵy bir qarý jasyrylǵan oryndy polıtsııa qyzmetkerleri Tarazdaǵy eski bos ǵımarattan tapty. Qaptyń ishinen 16 kalıbrli «IJ-26» markaly qos uńǵyly, 16 kalıbrli «IJ-17» markaly bir uńǵyly kesilgen ańshy myltyǵy, patrondary bar «IJ-SPL-01» markaly tapansha tabyldy», – deıdi Jambyl oblysy PD bastyǵynyń orynbasary polıtsııa polkovnıgi Nurjan Rahmetýllaev.

Sondaı-aq, oblys ortalyǵyndaǵy temir joldardyń janynan 16 kalıbrli «IJ-ZK» markaly bir oqpandy ańshy myltyǵy, «Baıkal» markaly travmatıkalyq tapansha, «Skorpıon» elektroshokeri jáne 27 oq-dári tabylǵan.

Polıtsııa polkovnıginiń aıtýynsha, ishki ister organdarynda tirkelmegen qarýdy quqyq buzýshylar negizinen sharýa qojalyqtarynyń aýmaǵynda saqtaıdy. 2023 jyldyń mamyr aıynyń basynda Jambyl aýdandyq polıtsııa bóliminiń qyzmetkerleri Aqbulym aýylynyń shetindegi sharýa qojalyǵynyń aýmaǵyndaǵy saraıdan 16 kalıbrli «IJ» markaly bir oqpandy ańshy myltyǵyn taýyp, tárkilegen.

Qarýdy izdeý jáne zańsyz aınalymnan alý jumystary áli de jalǵasady.

Buǵan deıin Jambyl oblysynda tasjol jıeginen qarý-jaraq tabylǵanyn jazǵan bolatynbyz.