Jambyl oblysynyń «Parasatty otbasylary» anyqtaldy
TARAZ. QazAqparat – Jambyl oblysynda 5772 januıa qatysqan «Parasatty otbasy» baıqaýy óz máresine jetip, jeńimpazdar marapattaldy, dep habarlaıdy QazAqparat.
Oblys ákimdiginiń bilim basqarmasy men QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti, «Jambyl–adaldyq alańy» jobalyq keńsesiniń birigip uıymdastyrýymen ótken shara parasatty otbasy qundylyqtaryn nasıhattaý, otbasy músheleriniń arasyndaǵy baýyrmaldyq, qaıyrymdylyq, dostyq qarym-qatynasty qalyptastyrý, zamanaýı jetistikterge laıyqty parasatty tulǵany damytý, ozat-oıly, parasatty, qaıyrymdy oqýshyny anyqtaý maqsatyna negizdeldi.
Baıqaýdyń aýdandyq, qalalyq kezeńine 5772 otbasy qatysyp, úkimettik emes uıymdar, Nur-Otan partııasy, ardager ustazdar men qoǵam qaıratkerlerinen qurylǵan baıqaýdyń qazylar alqasy úzdikterdi anyqtaǵan bolatyn. Al, Taraz qalalyq Mádenıet úıinde ótken «Parasatty otbasy» baıqaýynyń oblystyq kezeńine 67 otbasy joldama alyp, ózara baq synasty. Olar baıqaý sharty boıynsha 11 nomınatsııa negizinde saıysqa tústi.
Otbasy – ár balaǵa úlken ómirge esik ashatyn negizgi oryn. Otbasynda ónege, úlgi kórip, boıyna jaqsy qasıetterdi sińirip ósken balalar erteń elimizdiń baıandy bolashaǵynyń kepili bolmaq. Parasatty otbasydan shyqqan urpaq erteń elimizdi gúldendiretinine senemin. Ol úshin osyndaı mańyzdy, taǵylymdy sharalar jıi uıymdastyrylyp tursa ıgi is bolar edi»,- deıdi «Asyl Arman» ulttyq dástúr men ónerdi qoldaý qoǵamdyq birlestiginiń tóraǵasy Rınat Nuraqbaev.
Sonymen tartysty ótken óner men ónegeniń, birlik pen biliktiliktiń baıqaýynda Jambyshl aýdanynan qatysqan Sabyrbekovtar januıasy jeńiske jetip, «Parasatty otbasy» atandy. Ózge de qatysýshylar arasynan on nomınatsııa boıynsha úzdik otbasylar marapattaldy. Olarǵa dıplomdar jáne baǵaly syılyqtar tabystaldy.
Jeńimpaz atanǵan otaǵasy Bolat Sabyrbekov baıqaýdyń talaptary ońaı bolmaǵanyn, alaıda jumyla kótergen júktiń aýyrlyq etpegenin tiline tıek etip, óziniń júrekjardy qýanyshymen de bólisti.
Aldaǵy ýaqytta jarystyń jeńimpazdar men belsendi qatysýshylary parasattylyq «elshilerine» aınalǵan dáriskerler pýlyn qalyptastyryp, qoǵamda parasattylyq mádenıetti kóterýge, ádeptilikti damytýǵa baǵyttalǵan dárister men trenıngter ótkizetin bolady.
