Jambyl oblysynyń óz «Medeýi» paıda bolady
JAMBYL. QazAqparat - Jambyl oblysynyń Jýaly aýdanynda taý-shańǵy bazasy salynady. Bul týraly oblys ákimi Asqar Myrzahmetovtyń tóraǵalyq etýimen ótken jıynda aıtyldy, dep habarlaıdy QazAqparat «Jambyl» telearnasyna silteme jasap.
Atap ótilgendeı, taý bókterindegi tabıǵaty kórikti Jýaly aýdanynda «Qar-Alma» atalatyn taý shańǵy bazasy boı kóteredi. Demalys aımaǵynda oblys turǵyndary men qonaqtary bıyldyń ózinde-aq demalýǵa múmkindik alady. Keshenniń qurylys jumystary birer kúnde bastalyp, ony 5 aıda bitirý josparlanǵan.
Oblys ákimi Asqar Myrzahmetov jergilikti kásipkerlermen kezdesip, mega jobaǵa atsalysýǵa shaqyrdy.
«Búgin oblystaǵy bedeldi azamattardy jınap, nazarlaryńyzǵa joba usynǵaly otyrmyz (...) Qazirdiń ózinde 4-5 adam qyzyǵýshylyq tanytyp otyr. Kelisseńizder boldy. Jerdi bólip beremiz. Tek bir talap bar. Alǵan soń jeltoqsan aıyna deıin tolyq bitýi kerek», - dedi Jambyl oblysynyń ákimi Asqar Myrzahmetov.
Taý-shańǵy kesheni Eýropalyq standarttarǵa saı salynbaq. Joǵary deńgeıdegi qyzmet, saf aýa, qoljetimdi baǵa, jan qalaýyńyzǵa saı demalys, qonaqúıler men meıramhanalar - munyń bári jańa keshende bolady. Ol Tarazdan 100 shaqyrym qashyqtyqta ornalasatyn bolady.
Oblys ákimdiginiń maqsaty - ınvestorlardy syrttan tartpaı, jergilikti kásipkerlerge múmkindik berý. Bul bolashaǵy zor jobaǵa tıimdi qarajat quıý arqyly kásipkerler de qomaqty tabysqa kenelmek.
Jıyn barysynda keshenniń joba-josparymen tolyq tanysqan kásipkerler de muny jaqsy túsinedi. Sondyqtan da keıbiri usynysty birden qoldap, 10 shaqty kottedj salýǵa nıet bildirdi.
