Jambyl oblysynyń Órnek aýylynda alǵash ret balabaqsha ashyldy
TARAZ. QazAqparat – Táýelsizdik kúni merekesine oraı Jambyl oblysynda birneshe áleýmettik mańyzy bar nysan paıdalanýǵa berildi desek, solardyń biri T.Rysqulov aýdany Órnek aýylyndaǵy «Qarlyǵash» balabaqshasy,-dep habarlaıdy QazAqparat tilshisi.
Memlekettik-jekemenshik áriptestik aıasynda ashylǵan balabaqsha 140 balaǵa shaqtalǵan.
Eki qabatty, jalpy aýmaǵy 900 sharshy metrdi quraıtyn ǵımarat jas óskinderdi sapaly tárbıe jáne laıyqty bilimmen qamtýy úshin tolyq zamanaýı úlgide jabdyqtalǵan.
Órnek aýylynyń turǵyndary bul balabaqshanyń ashylýyn kópten kútken edi. Óıtkeni, 2 myńǵa jýyq halqy bar aýylda buǵan deıin balabaqsha múlde bolmaǵan. Nebári 70 oryndyq shaǵyn ortalyq jumys istegen.
Sáýletti ǵımarattyń ashylý saltanatyna arnaıy qatysqan aýdan ákimi Erbolat Sadyrqulov aýdandaǵy memlekettik baǵdarlamalar aıasynda atqarylyp jatqan ıgi isterdi toqtalyp ótti. Aýdan basshysy tárbıe oshaǵynyń tabaldyryǵyn attaǵan óskeleń órenderge jarqyn bolashaq tilep, aýyl turǵyndaryn ortaq qýanyshpen quttyqtady.
Jalpy ǵımaratty jabdyqtaýǵa 200 mıllıon teńge jumsalǵan. Balabaqsha ystyq jáne sýyq sýmen, tolyq jylýmen qamtylǵan. Mekeme qajetti qural jabdyqtarmen tolyq qamtamasyz etilgen. Munda balalardyń ıgiligi úshin ázirge 6 top jumys isteıdi. Esigin elge aıqara ashqan bóbekjaıǵa jergilikti 23 adam jumysqa tartylǵan.
