Jambyl oblysynyń mektepterinde sabaqtar búgin de bolmaıdy
TARAZ. QazAqparat - Jambyl oblysyn aıaz býyp tur, sol sebepti mekteptegi sabaqtar taǵy da toqtatyldy, dep habarlaıdy QazAqparat.
30 qańtarda Taraz qalasy, Moıynqum, Talas, Sarysý, aýdandarynyń 1-9 synyp arasyndaǵy oqýshylary sabaqqa barmaıdy. Óńirdiń ózge aýdandarynyń barlyǵynda sabaqtar tek bastaýysh synyp oqýshylary úshin ǵana bolmaıdy, dep túsindirdi oblystyq bilim basqarmasyndaǵylar.
Aıta keteıik, aýa temperatýrasy -25 bolǵan jaǵdaıda sabaq bastaýysh synyp oqýshylary úshin toqtatylady, al temperatýra - 27 gradýs bolsa, 9 synypqa deıingi oqýshylar sabaqqa barmaıdy. Aýa temperatýrasy -30 gradýsqa jetken jaǵdaıda sabaqtar barlyq synyptar úshin toqtatylady.
29 qańtar kúni sabaq 1-11 synyp aralyǵyndaǵy oqýshylar úshin toqtatylǵan bolatyn.
Sınoptıkter óńirde jaqyn ýaqytta kún jylıtynyn aıtýda.
