Jambyl oblysynyń Qyrǵyzstanmen shektesetin tusynda 30 keli 406 gramm «geroın» tabyldy
ASTANA. 10 maýsym. QazAqparat /Aıdar Ospanalıev/ - Jambyl oblysynda shekarashylar men keden qyzmetkerleri elimizdiń aýmaǵynan zańsyz ótkizilmek bolǵan 30 kg 406 gramm «geroın» tapty.
Qarjy mınıstrliginiń Kedendik baqylaý komıteti resmı ókiliniń málimetinshe, kontrabandalyq qylmyspen kúreste pármendilik tanytyp kele jatqan Jambyl oblysy boıynsha Kedendik baqylaý departamentiniń Kontrabandaǵa qarsy kúres basqarmasynyń qyzmetkerleri ótken aıdyń sońǵy on kúninde 10-nan asa, maýsymnyń alǵashqy aptasynda 5 qylmystyq is qozǵap, memleket qazynasyna shyǵyn keltirip, ońaı oljaǵa tapqysy kelgenderdiń jolyn kesti.
Bıylǵy jyldyń eń kólemdi esirtkisin Jambyl oblysynyń kedenshileri men shekarashylary 2 maýsym kúni anyqtady.
Shekara qyzmetiniń №2035 áskerı bólimi men Kontrabandaǵa qarsy kúres basqarmasynyń qyzmetkerleri shuǵyl sharalar kezinde Merki aýdanyndaǵy «Aspara» shekara zastavasynan 17 shaqyrym jerde Qazaqstan Respýblıkasynyń Memlekettik shekarasy aýmaǵynan zańsyz ótken júk kóligi týraly aqparat alady.
Shekarashylar zańsyz júktiń izine túsip kele jatyp, halyq tutynatyn taýarlar salynǵan túıinshekterdi taýyp alady. Shekarashylar birden Jambyl oblystyq Kedendik baqylaý departamentiniń Kontrabandaǵa qarsy kúres basqarmasynyń qyzmetkerlerin shaqyryp, kedenshiler tabylǵan 93 dana túıinshekti tekserip, kedendik qunyn anyqtaý maqsatynda ýaqytsha saqtaý qoımasyna ákeledi. Al tekserý kezinde 5 túıinshekten 67 paketke salynǵan sary tústi untaqtalǵan zat tabylǵan.
9 maýsym kúngi sot saraptamalyq qorytyndysy atalǵan sary tústi zat esirtkiniń aýyr túrine jatatyn salmaǵy 30 keli 406 gramm «geroın» ekenin anyqtady. Qazirgi ýaqytta qosymsha tergeý amaldary júrgizilýde.
