Jambyl oblysynyń Qordaı aýdanynda aýqymdy qurylys jumystary bastaldy
TARAZ. QazAqparat – Aǵymdaǵy jyly Qordaı aýdanyndaǵy jóndeý-qurylys jumystaryna 20,5 mıllıard teńge bólý josparlanǵan bolatyn. Búgingi tańda 46 joba boıynsha merdigerler anyqtalǵan, - dep habarlaıdy QazAqparat oblys ákiminiń baspasóz qyzmetine silteme jasap.
Aǵymdaǵy jyly Qordaı aýdanyndaǵy jóndeý-qurylys jumystaryna 20,5 mıllıard teńge bólý josparlanǵan bolatyn. Búgingi tańda 46 joba boıynsha merdigerler anyqtalǵan.
Búgingi tańda úsh mekteptiń, onyń ishinde Qalǵutty jáne Kúnbatys aýyldarynda bilim nysandarynyń qurylysy bastalyp úlgerdi desek, bul nysandar 2021 jyldyń qyrkúıek aıynda paıdalanýǵa beriledi dep kútilýde.
Sonymen qatar, aýdan ortalyǵyndaǵy 50 páterli 5 qabatty turǵyn úıdiń, Sarybulaq aýylynyń Mádenıet úıindegi qazandyqtyń qurylystary bastaý aldy.
Ol ǵana emes, Qordaı jáne Áljan Ana aýyldarynyń jańa turǵyn alqaptaryna ınjenerlik ınfraqurylym júrgizilýde. Jalpy uzyndyǵy 40 shaqyrym bolatyn tórt aýyl arasyndaǵy joldardy ortasha jóndeý, Kenen aýylyndaǵy sýmen jabdyqtaý júıesin jańǵyrtý, bes oqý ornynyń qazandyqtaryn qatty otynnan tabıǵı gazǵa aýystyrý jumystary júrgizilýde. Sonymen qatar, úsh mektep kúrdeli jóndeýden ótýde. Qordaı aýylyndaǵy 21 kóshege ortasha jóndeý jumystary bastalǵan. Ótken jyly bastalǵan uzyndyǵy 7,4 shaqyrymdy quraıtyn «Aýqatty - Báıterek» avtojolynyń qurylysy jalǵasýda.
Sondaı-aq, Qarakemer aýylynda eki páterli 10 turǵyn úıdiń qurylysy bastalǵan. Onda negizinen aýylǵa kelgen jas mamandar men áleýmettik turǵyn úı kezeginde turǵan azamattar qonystanbaq. Odan bólek, osy aýyldyń turǵyny Q.Moldaseıitovtiń demeýshiligimen 15 kelýshige arnalǵan medıtsınalyq emhana salynýda.
Sonymen qatar, 60 páterlik úsh turǵyn úıdiń qurylysyn salý, úsh mekteptegi sport keshenderin, alty aýyldaǵy sý qubyryn qaıta jańǵyrtý, jeti jańa turǵyn alqapta ınjenerlik ınfraqurylymdy nyǵaıtý, Qordaı jáne Áljan ana aýyldarynyń 24 kóshesin jaryqtandyrý sharalary júzege asady.
2020 jyly 337 shaqyrymdyq joldar jóndeledi. Ol úshin 6,6 mıllıard teńge qarastyrylǵan. Sonymen qatar, «Aýyl - el besigi», «Jumyspen qamtýdyń jol kartasy» memlekettik baǵdarlamalary aıasynda aýdannyń 18 eldi mekenindegi joldardy jóndeýge 5,2 mıllıard teńge bólingen. Bul oraıda ortasha jóndeýden ótetin joldardyń uzyndyǵy 289,6 shaqyrymdy quraıdy. Munyń bári aýdandyq mańyzy bar avtomobıl joldarynyń tehnıkalyq jaǵdaıyn jaqsartyp, jaqsy jáne qanaǵattanarlyq úlesin 90 paıyzǵa, al eldi meken ishindegi kóshelerdiń kórsetkishin 70 paıyzǵa deıin jetkizýge múmkindik bermek,
Aıta ketý kerek, «Aýyl - el besigi» memlekettik baǵdarlamasy aıasynda aýdan ortalyǵyndaǵy 21 kóshe jóndeýden ótýi josparlanǵan desek, onyń 12 kóshesi boıynsha jumystar aıaqtalyp úlgerilgen. Osylaısha, Qordaı aýylynyń joldary 100 paıyz asfalt jabyndysymen qamtylatyn bolady.
Sondaı-aq, jol qozǵalysy qaýipsizdigin qamtamasyz etý maqsatynda Qarasý, Ótegen, Masanchı, Sortóbe, Ahatta, Bular batyr aýyldary arqyly ótetin joldardaǵy jol belgileri jańartylǵan.
