Jambyl oblysynyń dárigerleri men polıtseıleri COVID-2019-ǵa test tapsyrady
TARAZ. QazAqparat – Jambyl oblysynyń ákimi Berdibek Saparbaev tótenshe jaǵdaı jónindegi jedel shtabtyń kezekti otyrysyn ótkizdi, dep habarlaıdy QazAqparat óńir basshysynyń resmı saıtyna silteme jasap.
Otyrysta aımaqtaǵy epıdemıologııalyq jaǵdaı, karantındik rejımdi saqtaý jáne karantınnen keıingi kezeńde birqatar ónerkásiptik kásiporyndar men shaǵyn bıznes nysandarynyń jumysyn qaıta bastaýǵa baılanysty máseleler talqylandy.
Taýarlar men qyzmetterdiń sapasy men qaýipsizdigin baqylaý departamentiniń basshysy Berik Jarqynbekovtiń habarlaýynsha, 2020 jylǵy 23 sáýirdegi jaǵdaı boıynsha oblys aýmaǵynda jalpy 88 koronavırýs indetin juqtyrý oqıǵasy tirkelgen.
B. Jarqynbekovten oblys ákimi halyq arasynda aldyn alý jáne túsindirý jumystaryn kúsheıtýdi talap etti. Adamdarǵa olar ózin-ózi oqshaýlaý arqyly tek ózderin ǵana emes, jaqyndary men aınalasyndaǵylaryn da qorǵaı alatyndyqtaryn túsindirý kerek. Bul oraıda salalyq vedomstvonyń qyzmetkerleri buqaralyq aqparat quraldarynda belsendilik tanytpaı otyrǵandyǵy aıtyldy.
Óńirdegi bul baǵyttaǵy medqyzmetkerlerge eńbekaqydan bólek qosymsha tólemder tólenýde. Atap aıtsaq, naýryz aıynda 270 dáriger, onyń ishinde 40 dáriger men 129 orta medıtsınalyq qyzmetkerge 40,1 mln teńgege ústemeaqy tólengen. Naýryz aıynyń qorytyndysy boıynsha 8 medıtsınalyq uıym qarjy únemdeý esebinen 1319 qyzmetkerge jalpy somasy 88,9 mln teńgege syıaqy bergen. Medıtsınalyq qyzmetkerlerdiń turǵyn úı-turmystyq máseleleri de oń sheshimin tabýda. Osy turǵyda 232 medıtsınalyq qyzmetker qonaq úıge ornalastyrylyp, olardy jumys ornyna tasymaldaý úshin kólik uıymdastyrylǵan.
Oblysta COVID-2019 boıynsha medıtsına, polıtsııa jáne KVI-ge qarsy is-sharalarǵa qatysatyn áskerı qyzmetkerler testileýden ótip, olar jeke qorǵaný quraldarymen qamtamasyz etiledi. Sondaı-aq, jıynda karantın jaǵdaıynda adamdar azyq-túlik pen taǵamdardy úıge jetkizý qyzmetine kóbirek júgine bastaǵandyǵy aıtyldy. Sońǵy ýaqytta Taraz qalasynda jetkizip berý qarqyny 8 myńnan 11,5 myńǵa deıin ósken.
Sonymen qatar, basqosý barysynda óńirdegi epıdemııalyq jaǵdaı jaqsarǵan jaǵdaıda birqatar ónerkásiptik kásiporyndar men ShOB obektileriniń jumysyn kezeń-kezeńmen qalpyna keltirý máseleleri qaraldy. Ol boıynsha Taraz qalasy men aýdan ákimderiniń aldyna naqty mindetter qoıyldy. Eń aldymen, jergilikti atqarýshy organdar osy kásiporyndar men uıymdardyń tizimin anyqtap, olardyń árqaısysymen memorandým jasasýy kerek. Memorandýmǵa sáıkes ol nysandar barlyq aldyn alý jáne epıdemıologııalyq talaptardy qatań saqtaýǵa mindettelmek.
