Jambyl oblysynyń damýyna úles qosqandar endi arnaıy nagradaǵa usynylady
TARAZ. QazAqparat - Jambyl oblysynda óńirdiń órkendeýine ólsheýsiz úles qosyp, eleýli eńbek etkender oblys ákiminiń nagradasy «Oblysqa sińirgen eńbegi úshin» belgisimen marapattalatyn bolady. Oblys ákimdiginde ótken arnaıy jıynda tósbelginiń úlgisi tanystyryldy, dep habarlaıdy Jambyl oblysy ákimdiginiń baspasóz qyzmeti.
Óńir basshysy Asqar Myrzahmetovtyń tóraǵalyǵymen ótken basqasýǵa basqarma basshylary, aýdan ákimderi, zııaly qaýym ókilderi men ardagerler uıymynyń ókilderi qatysty.
Asqar Isabekuly oblysymyzda 1 mıllıonnan asa halyq turatynyn, onyń ishinde aımaqtyń damýyna zor úles qosyp, talaı jyldar boıy talmaı ter tókken ásirese aǵa býynnyń ókilderi az emestigin atap aıtty. Bul belgi sol azamattardyń eńbegin eskerip, mártebesin arttyrýǵa, sol arqyly ózgelerge úlgi -ónege bolýǵa negizdelýde.
Jıynda oblys ákiminiń birinshi orynbasary Bekbolat Orynbekov «Oblysqa sińirgen eńbegi úshin» belgisiniń mán-mańyzy men sıpattamasyna toqtalyp, slaıd arqyly onyń bekitilgen úlgisimen tanystyrdy.
Onyń aıtýynsha, oblys ákiminiń bul nagradasy azamattardyń oblysqa sińirgen aıryqsha eńbegin, ekonomıkany, áleýmettik, qoǵamdyq salalardy, ǵylym men mádenıetti, sportty damytýǵa qosqan eleýli úlesin, quqyq qorǵaý organdaryndaǵy úlgili qyzmetin, belsendi qaıyrymdylyq isin baǵalaýdyń belgisi retinde resmı kótermeleý men moraldyq yntalandyrý maqsatynda taǵaıyndalady. Ol oblystyń, elimizdiń basqa óńirleri men ózge memleketterdiń azamattaryna, sondaı-aq, óńirdiń damýyna óz úlesterin qosqan Qazaqstannyń memlekettik jáne qoǵam qaıratkerlerine tabys etiletin bolady.
Belgimen nagradtaý oblys ákimi apparaty basshysynyń jazbasha qorytyndysy boıynsha oblys ákiminiń ókimine sáıkes júzege asyrylady. Qajet bolǵan jaǵdaıda, oblys ákimi Belgimen nagradtaýǵa oblystyń memlekettik organdary basshylarynyń, qala jáne aýdan ákimderiniń, qoǵamdyq qurylymdardyń usynymdaryn qaraý jáne usynystar ázirleý jónindegi arnaıy komıssııa qurýy múmkin. Belgi men onyń kýáligin oblys ákimi, sondaı-aq oblys ákimi ýákilettik bergen tulǵalar tabys etedi. Tabys etý saltanatty jaǵdaıda ótedi.
Aıta ketý kerek, buǵan deıin eńbegimen kózge túskender oblys ákiminiń Qurmet gramotasy, Alǵys hatymen marapattalyp kelse, endigi ýaqytta onyń qataryn «Oblysqa sińirgen eńbegi úshin» belgisi tolyqtyrady. Bul jańa belgide oblys esimin enshilep jatqan aqyn, jyr alyby Jambyl Jabaevtyń beınesi belgilengen. N
aqtyraq toqtalsaq, belgi - altyn tústes, mys-myrysh qorytpasy - jezden jasalǵan, 34 mm durys sheńberden jáne negizden turady. Negiz eni 20 mm kógildir tústi jibek lentasymen qaptalǵan. Belginiń aldyńǵy jaǵynda Jambyl oblysynyń kontýrlyq kartasynyń aıasynda, Jambyl aqynnyń eskertkishiniń keskini beınelengen. Aqyn oń qolyn sozyp tur, sol qolynda dombyra bar. Belgi shetiniń ústińgi jaǵynda «OBLYSQA SІŃІRGEN EŃBEGІ ÚShІN» jazý dóńgelektenip jazylǵan, al belginiń tómengi bóliginde qazaq ulttyq oıýy salynǵan.
Basqosý barysynda oblystyń Qurmetti azamaty, «100 jańa esim» jobasynyń jeńimpazy Sembek Seıdázimov, oblystyq ardagerler keńesiniń tóraǵasy Erkinbek Soltybaev, jazýshy, halyqaralyq «Alash» ádebı syılyǵynyń ıegeri Nesipbek Dáýtaev, qoǵam qaıratkeri Jandar Káribaev, mádenıettanýshy Álibek Ámzeev, Taraz qalasynyń Qurmetti azamaty Qarjaýbaı Bekbolat jáne basqalar sóz alyp, belginiń mazmundylyǵyna toqtalyp, oramdy oılaryn ortaǵa saldy.
«Oblysqa sińirgen eńbegi úshin» belgisiniń alǵashqy ıegerleri Táýelsizdik merekesi qarsańynda ótetin saltanatty sharada marapattalmaq. Bul marapatqa búginde Taraz qalasy men aýdandardan 900-den astam usynys túsken. Asqar Isabekuly laıyqty tulǵalardyń nazardan tys qalmaýyn qadaǵalaýdy, kerek jaǵdaıda tizimdi taǵy da tolyqtyrýǵa bolatynyn jetkizdi. Sondaı-aq, keler jyly oblystyń 80 jyldyq mereıtoıy barysynda ózge de laıyqty azamattar atalmysh nagradany keýdesine taǵady jáne aldaǵy ýaqytta ol turaqty túrde tabystalatyn bolady.
