Jambyl oblysynyń Baızaq aýdanynda aýyzsý júrgizilmegen aýyldar sanaýly

TARAZ. QazAqparat - Jambyl oblysynyń Baızaq aýdanynda 43 eldi meken bolsa, sonyń 30-y aýyzsýmen qamtylǵan, dep habarlaıdy QazAqparat tilshisi.

Eldi mekenderdi aýyz sýmen qamtý boıynsha 2021-2025 jyldarǵa arnalǵan josparǵa sáıkes, búgingi kúni aýdandaǵy 13 aýyl ortalyqtandyrylǵan aýyzsýmen qamtylmaǵan. Degenmen, mundaǵy 8 aýylǵa aýyzsý júıesin júrgizý úshin jobalaý-smetalyq qujattamasy ázirlenip, saraptamanyń oń qorytyndysy alynyp qoıǵan. Osyǵan oraı, byltyr qurylys jumystaryn júrgizýge qarjy qarastyrý maqsatynda Jambyl oblysy ákimdiginiń Energetıka jáne turǵyn úı-kommýnaldyq sharýashylyq basqarmasyna barlyǵy 2 mlrd 644 mln 950 myń teńgeni quraıtyn bıýdjettik ótinim joldanǵan.

Baızaq aýdany ákimdigi Turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Jarqynbek Shogalovtyń aıtýynsha, qazirgi tańda respýblıkalyq jáne oblystyq bıýdjetterden tıisti qarajat bólinip, 8 eldi mekende qurylys jumystary bastalyp ketti.
Bólim basshysynyń sózine súıensek, aýdandaǵy Tóregeldi, Jibek joly aýyldaryn aýyzsýmen qamtý úshin de jobalaý-smetalyq qujattama ázirlenip, saraptamanyń oń qorytyndysy alynǵan. Shahan aýylyn Sarybaraq aýyly arqyly ortalyqtandyrylǵan aýyzsýmen qamtý josparlanǵan. Qazirgi tańda Sarykemer aýylynda – 3 036, Baızaqta – 673, Talasta – 584, Qostóbede – 295, Býrylda – 1 331, Jańaturmysta – 90, Kókbastaýda – 204, Seńkibaıda – 121, Bazarbaıda – 180, Úlgilide – 332, Qyzyl juldyzda – 715 aýla ortalyqtandyrylǵan aýyz sý júıesine qosylǵan.
Aıta keteıik, buǵan deıin Jambyl oblysyn úsh jylda 100 paıyz aýyzsýmen qamtý josparlanǵanyn jazǵan bolatynbyz.