Jambyl oblysynyń bas polıtseıi 10 jasar balanyń armanyn oryndady
TARAZ. QazAqparat – Jambyl oblystyq polıtsııa departamentiniń basshysy, polıtsııa general-maıory Janat Súleımenov áleýmettik jeli arqyly ótinish qaldyrǵan 10 jasar Konstantınniń armanynyn oryndady,- dep habarlaıdy QazAqparat tilshisi.
Bul týraly QazAqparat tilshisi atalǵan departamenttiń baspasóz qyzmetine silteme jasap habarlaıdy.
«Jambyl oblysy Polıtsııa departamentiniń «Instagram»-daǵy paraqshasyna 10 jasar balanyń ájesi Vıktorııa Mıhaılova jazba qaldyrǵan bolatyn. Ol nemeresine Polıtsııa departamentine ekskýrsııa uıymdastyrǵysy keletinin jáne Polıtsııa departamentiniń bastyǵy, polıtsııa general-maıory Janat Súleımenovpen kezdestirýdi qalaıtyny jóninde jazǵan. Budan bólek, ájesi nemeresi Konstantınniń úlgili oqýshy, «Aqbota», «Ponı», «Rýsskıı medvejonok», «Kengýrý» sekildi zııatkerlik konkýrstardyń júldegeri ekenin, sondaı-aq nemeresiniń udaıy patrýldik polıtsııa kólikterin erekshe qyzyǵýshylyqpen baqylap otyratynyn da jetkizgen»,-delingen habarlamada.
Óńirdiń bas polıtseıi jetkinshekti qabyldaýǵa qýana kelisip, kezdesý kúnin belgilepti.
Belgilengen kúni Konstantın ájesimen birge Polıtsııa departamentine kelgen. Polıtsııa general-maıory J. Súleımenov balaqaımen óziniń jumys kabınetinde kezdesip, emen-jarqyn suhbat qurdy. Áńgime barysynda Kostıa óziniń oqýdaǵy jetistikteri, shahmatqa áýestigi jáne tańdaǵan bolashaq mamandyǵy týraly aıtyp beredi.
Sondaı-aq, balaqaı polıtseılerdiń jumysy týraly múmkindiginshe kóp bilgisi keletinin jetkizgen. Óz kezeginde Janat Súleımenov oǵan Polıtsııa departamentiniń mýzeıinde bolyp, ishki ister organdarynyń qalyptasý tarıhymen tanysýdy usyndy. Tártip saqshylarynyń qym-qýyt tirshiligimen tanysý rásimi Taraz qalasynyń Jedel basqarý ortalyǵynda jalǵasqan. Ortalyqtaǵy ekrannan búkil qalany kórgen Kostıa óziniń tańdanysyn jasyra almady.
«Kezdesý sońynda Janat Qýanyshuly Konstantınge myqty densaýlyq, oqýda tabys jáne óz otbasyn árdaıym jeńisterimen qýantýdy toqtatpaýyn jáne sáttilik tiledi. Qazaqstan Respýblıkasy Іshki ister mınıstrliginiń emblemasy bar qolsaǵat oblystyń bas polıtseıi syıǵa tartqan kezde Konstantınniń qýanyshynda shek bolmady»,-deıdi PD baspasóz qyzmetiniń jetekshisi Gúlsara Muhtarqulova.
Kezdesý sońynda balanyń ájesi Vıktorııa Mıhaılova polıtsııa general-maıoryna osyndaı jyly qabyldaýy úshin alǵysyn bildirip, bul jyly júzdesý nemeresiniń jadynda uzaq jyldar boıy qalatynyna senim bildirdi.
