Jambyl oblysynyń barlyq aýdanynda áleýmettik dúkender ashylady
TARAZ. QazAqparat – Jambyl oblysynyń ákimi Berdibek Saparbaev kezekti apparat májilisinde aýdan ákimderiniń jumysyn synǵa alyp, olardyń áleýmettik mańyzy bar taýarlar baǵasyn turaqtandyrý boıynsha der kezinde sharalar qabyldamaǵanyn atap ótti,- dep habarlaıdy QazAqparat tilshisi.
Monıtorıng málimetterine toqtalǵan oblys ákimi T. Rysqulov aýdanynda azyq-túlik taýarlarynyń 19 ataýynyń baǵasy birden 10 paıyzǵa, Jýaly aýdanynda segiz, Merki aýdanynda jeti paıyzǵa óskendigin alǵa tartty.
«T.Rysqulov aýdanynda bir keli qant 290 teńgeden, pııaz 70, sábiz 120, kartop 140 teńgeden satylýda. Ákimder bul máseleni baqylaýda ustaýǵa mindetti. Kún saıyn tańerteń ózderi aýdan ortalyǵyn aralap, baǵany tekserip, tazalyqty qadaǵalap, joldardy qarap, basqa da mańyzdy máselelerdi qamtýy tıis. Anyqtalǵan buzýshylyqtardy joıý boıynsha naqty tapsyrmalar berýi kerek», - dedi oblys ákimi. Máselege qatysty saýaldar Baızaq, Moıynqum, Talas aýdandaryna da joldandy.
Aýyl sharýashylyǵy basqarmasy basshysynyń m.a. Qaırat Amanovtyń aqparaty boıynsha, Jýaly aýdanynda azyq-túlik taýarlaryn saqtaýǵa arnalǵan toǵyz, Merki aýdanynda – segiz, T. Rysqulovta – úsh qoıma bar. Al, Talas jáne Sarysý aýdandarynda birde-bir qoıma joq. Aıta keteıik, oblys boıynsha mundaı barlyǵy 230 qoıma bar.
«Bizdiń mindetimiz – azyq-túlik taýarlarynyń qoryn qalyptastyrý. Ákimder sharalar qabyldanyp jatyr dep sendirgenmen, ázirge ol jumystardyń nátıjesi kórinbeıdi», - dedi aımaq basshysy.
Baǵanyń negizsiz ósýine jol bermeý maqsatynda «Taraz ÁKK» AQ dúkender jelisinde birqatar áleýmettik mańyzy bar taýarlar naryqtyq baǵadan 10-20 paıyzǵa tómen satylýda.
«Taraz ÁKK» AQ Basqarma tóraǵasy Oljas Qarjaýov oblys ortalyǵynda ondaı dúkenderdiń sany 15-ke deıin artatynyn habarlady. Qazir qalada osyndaı alty dúken jumys istep tur. Sharýalar óz ónimderin tikeleı sol jerge jetkize alady.
«Turǵyndar áleýmettik dúkenderdegi baǵalarǵa rızashylyqtaryn bildirip, osyndaı dúkenderdi kóptep ashýdy surap otyr. Qala boıynsha ár aýmaqtan osyndaı pavılondar ashyńyzdar. Aýdandardaǵy jaǵdaı máz emes. Ákimderdi bul suraq múldem qyzyqtyrmaıtyn sııaqty. Olardyń eshqaısysy aýyldarda áleýmettik pavılondar ashýǵa tyryspaıdy. Nege sharýa qojalyqtarymen jumys jasamaısyzdar? Nelikten olarǵa utymdy usynystar usynbaısyzdar?» – dedi Berdibek Saparbaev.
Naqty jaýap ala almaǵan aımaq basshysy barlyq aýdanda 15 jeltoqsanǵa deıin áleýmettik pavılondar ashýdy buıyrdy.
«Merekege qarsańynda biz ónimdi naryqtyq baǵadan tómen baǵada satylýyn qamtamasyz etýge tıispiz. Turǵyndardyń turmystyq tabysyn arttyrý boıynsha pılottyq jobasyn jáne «Alqaptan sórege deıin» jobasyn júzege asyrýdy jalǵastyrý qajet. Barlyq aýdandarda jáne oblys ortalyǵynda jármeńkeler ótýi tıis», - dep buıyrdy aımaq basshysy.
Oblys ákimi ishki naryqty otandyq taýarlarmen qamtý, áleýmettik mańyzy bar azyq-túlik taýarlarynyń baǵasyn turaqtandyrý, baǵanyń negizsiz ósýin jáne deldaldyq shemalardy boldyrmaý boıynsha naqty mindetter júktedi.
