Jambyl oblysynyń aýdanynda jemis-jıdek saqtaıtyn qoıma ashyldy
TARAZ. QazAqparat - Jambyl oblysy Jambyl aýdanynda buǵan deıin syıymdylyǵy 16 600 tonnany quraıtyn 14 qoıma bar bolatyn. Jýyrda eldimekende 2 myń tonnany quraıtyn jańa astyq jáne kókónis saqtaý qoımasy ashyldy, dep habarlaıdy QazAqparat tilshisi.
Qazirdiń ózinde jańa qoımaǵa jergilikti sharýalardyń 167 tonna almasy saqtaýǵa qoıylǵan. Nysannyń qurylysy sáýir aıynda bastalyp, qazan aıynda aıaqtalǵan. Qoımanyń jalpy alańy 1 gektardy quraıdy.
Jańa qoıma 12 jeke kameradan turady. Ár kamerada jeke salqyndatqysh, ylǵaldandyratyn qural-jabdyqtar qoıylǵan. Odan bólek, jemis-jıdekten bólinetin etılen gazyn kómirqyshqyl gazyna aınaldyryp, bakterııalardy joıatyn qurylǵy da ornatylǵan. Joba quny - 472 mıllıon teńge. Sondaı-aq munda jumysshylarǵa arnalǵan ashana, jýynatyn bólme men demalys orny da qarastyrylǵan.
Aýdanǵa arnaıy baryp, qoımanyń ashylý saltanatyna qatysqan oblys ákiminiń orynbasary Murathan Shúkeev, bul jobany «Agrarlyq nesıe korporatsııasy» qarjylandyrǵanyn, aýyl sharýashylyǵy taýarlaryn óndirýshilerge korporatsııanyń tıimdi sharttary kóp ekenin tilge tıek etti.
«Agrarlyq nesıe korporatsııasy» Jambyl oblystyq fılıalynyń dırektory Nurǵalı Seıilbekov ol týraly tolyǵyraq aıtyp berdi.
«Birinshiden, bul - uzaq merzimge nesıelendirý. Ekinshiden, nesıe tómen paıyzben beriledi. Taǵy bir artyqshylyǵy - eki jyldan úsh jylǵa deıin negizgi boryshty óteýge syıaqy qarastyrylǵan jáne negizgi borysh jylyna bir ret óteledi. Sondaı aq, bizde arnaıy jeńildikter de bar - nesıe alýshy salynyp jatqan nysandy kepilge qoıýyna bolady», - dedi ol.
Aıta ketý kerek, bıyl aýdan boıynsha 6645 ga kókónis daqyldary egilse, baǵbandar 660 ga alma baqtaryn baptaýda. Mol ónim jınaýǵa yntaly sharýalarǵa kókónister men jemisterdi sapaly saqtaý úshin mundaı qoımalardyń qajettigi aıtpasa da túsinikti.
Avtory: Ǵıbrat SEMBAI
