Jambyl oblysynyń ákimi sý tasqyny qaýpi bar aımaqtardy tekserip shyqty
TARAZ. QazAqparat - Jambyl oblysynda sý tasqyny qaýpi bar aýdandarda táýlik boıy baqylaý jumystary jalǵasýda, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.
Eske sala ketsek, naýryz aıynyń sońynda Jambyl aýdanynda, Qaratóbe jáne Aısha bıbi aýyldyq okrýgteri aýmaǵynda («Dorojnık» jáne «Maıskoe» saıajaı alaby) sý tasqyny qaýpi týyndady.
Asa ózeni arnasynan shyǵyp ketken sý avtojoldy basyp qaldy. Turǵyn úılerdi sý alyp ketpes úshin ózen jaǵasyndaǵy bekinister úsh metrge deıin bıiktetildi. Odan bólek, Asa ózeniniń jaǵasy shaıylyp, «Batys Eýropa - Batys Qytaı» avtojolynyń 510-521 shaqyrymdary aýmaǵynda qaýip týyndady jáne jol qozǵalysy toqtatyldy.
TJ qyzmetteriniń aıtýynsha, eldi mekenderge qaýip tónip turǵan joq. «Batys Eýropa - Batys Qytaı» avtojolynyń 515 shaqyrymynda uzyndyǵy 1 100 metr bolatyn bógetti nyǵaıtý jumystary júrip jatyr. Sý deńgeıi men jaǵalaý táýlik boıy baqylaýda.
Baspasóz qyzmetiniń habarlaýynsha,búgin Jambyl oblysynyń ákimi Kárim Kókirekbaev tikushaqpen Talas, Shý, Moıynqum, Qordaı aýdandaryn tekserip shyqty. Áýeden Asa, Talas, Shý jáne Aqkól ózenderiniń arnasyn baqylady. 
