Jambyl oblysynyń ákimi soǵys ardagerin Jeńis kúnimen quttyqtady

ASTANA. QazAqparat - Uly Jeńis kúni Otan úshin ot keshken batyrlar rýhyna taǵzym etý, qolda bar asyldardy ardaqtaý, Jambyl oblysynda qalyptasqan ıgi dástúr. Osyǵan qaraı oblys ákimi Kárim Kókirekbaev soǵys ardageri Berdaly Qarymsaqov qarııany Uly Jeńis kúnimen arnaıy quttyqtap baryp, syı-sııapat kórsetti, dep habarlaıdy Jambyl oblysy ákimdiginiń baspasóz qyzmeti.

Búginde toqsannan asyp otyrǵan ardager kezinde Jýkov basshylyq etken dıvızııanyń quramynda bolyp, atqysh-avtomatshy retinde Lenıngrad, Kıev, Stalıngrad qalalaryn qorǵaýǵa qatysyp, maıdan joldarymen Berlınge deıin jetken. 1-shi jáne 2-shi dárejeli Uly Otan soǵysy ordeniniń, «Germanııany jeńgeni úshin», «Qarýly Kúshter», «1941-1945 jyldardaǵy Uly Otan soǵysyndaǵy Jeńis», «Marshal Jýkov» sııaqty medaldarmen marapattalǵan.

Maıdanger ózin quttyqtaı kelgen aımaq basshysyna alǵysyn bildirip, óziniń aq batasyn berdi. Sondaı-aq, óńirdiń órkendeýine, qaryshtap damýy jolynda jasap jatqan eńbegine kóńili tolatyndyǵyn jetkizdi.

Óńir basshysy ardagerge Ekinshi dúnıejúzilik soǵys kezindegi erligi, beıbit ómirdegi jankeshti eńbegi úshin alǵys aıtyp, oǵan myqty densaýlyq pen uzaq ómir tilep, aqsaqalǵa qundy syılyqtar tabystady.